Almatyda jeke ınvestor «Almatyelektrotrans» JShS-yn satyp aldy
ALMATY. QazAqparat- Almatyda jeke ınvestor mýnıtsıpaldyq «Almatyelektrotrans» JShS aktsııasynyń 70 paıyzyn satyp aldy. Ol kásiporynǵa aldaǵy jarty jylda qosymsha 200 reseılik jańa avtobýsty satyp alatyn bolady. Búgin Almaty ákimdiginde qalanyń 2015 jyldaǵy áleýmettik-ekonomıkalyq damý barysyn qorytyndylaýǵa qatysty ótken jıyn barysynda qala ákimi Baýyrjan Baıbek osylaı málimdedi.
«Búgin jeke ınvestor «Almatyelektrotrans» JShS-ynyń 70 paıyzdyq úlesin satyp aldy. Biz buǵan qýanamyz. Kásipker keshe resmı hat joldady. Aldaǵy jarty jylda bıýdjetten emes, ol óziniń jeke qarjysyna 200 jańa LıAz avtobýsyn satyp alatyn boldy. Bul avtobýstar aldaǵy ýaqytta eski avtobýstardyń ornyna qoldanylady jáne qaladaǵy baǵdarlar jelisiniń 12-15 paıyzyn qamtıdy. Al eski avtobýstardy jelige shyǵarýǵa bolmaıdy. Óıtkeni olar jolaýshylardyń ómirine qaýip tóndiredi», - dedi qala ákimi.
Sonymen qatar, Baýyrjan Baıbek «OŃAI» kólik kartasy júıesi jol aqysynyń tolyqqandaı jınalýyna septigin tıgizetindigin aıtty.
«Bul júıe qoǵamdyq kólikterde jol aqysyn tóleýdiń ashyqtyǵyn jáne sapaly bolýyn qamtamasyz etedi. Sondaı-aq, jolaýshylardy tasymaldaýǵa edenderi shirigen, eski avtobýstar emes, qazirgi talaptarǵa saı, zamanaýı avtobýstar qoldanylýy tıis. Biz sonda shyǵyn kóp baǵdarlardy bıýdjetten qarajylandyra alamyz», - dedi B. Baıbek.
Ákim sonymen qatar, qala turǵyndarynyń kópshiligi jol aqysyn tóleýge qatysty jańa júıeniń engizilgenine rıza ekendikterin aıtty.
