Almatyda jedel járdemniń keshigý sebebi ataldy
ALMATY. QazAqparat - Maýsym aıynda qazaqstandyqtar jedel járdemdi jıi shaqyra bastaǵan. Osy sebepti, medıtsınalyq kómekti kútý ýaqyty da uzarǵan, dep habarlaıdy QazAqparat tilshisi.
Búgin Almaty qalalyq Qoǵamdyq keńesiniń onlaın otyrysy ótti. Onda qoǵam qaıratkeri, jýrnalıst Sergeı Ponomarev turǵyndardan túsip jatqan suraqty qoıdy. Olardyń sózinshe, qońyraý shalynǵannan keıin jedel járdemniń keletin ýaqyty eki saǵattan eki kúnge deıin sozylady. Múldem kelmeı qalatyn jaǵdaılar da bolady.
«Iá, biz bul jaǵdaı týraly bilemiz. Turǵyndar baılanys ortalyǵymyzǵa shaǵymdaryn aıtyp, habarlasady. Qazir jedel járdem qyzmetine júkteme artty. Kúnine 6 myńǵa jýyq qońyraý túsedi. Olardyń 50% aýrýhanaǵa jatqyzýmen jáne jedel járdemniń kelýimen baılanysty: 30% jedel járdem boıynsha, 20% aýrýhanaǵa jatqyzý boıynsha»,– dedi «Mindetti áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń basqarma tóraǵasy Aıbatyr Jumaǵulov.
Onyń aıtýynsha, qazir barlyq máseleni sheshý múmkin bolmaı jatyr.
«Ár jaǵdaıdy jeke qarastyrýǵa tyrysamyz jáne olardy múmkindiginshe sheshýge áreket jasaımyz», - dedi ol.
Óz kezeginde, Ulttyq shuǵyl medıtsınany úılestirý ortalyǵy basqarma tóraǵasynyń mindetin atqarýshy Baýyrjan Júsipov kúnine shaqyrtýlarǵa respýblıka boıynsha 1400 brıgada shyǵatynyn atap ótti.
«Búgingi tańda bizde 1900-ge jýyq jedel járdem kóligi bar. Árıne, kólik jetispeýshiligi baıqalady. Dese de, atalǵan problemany aqyryndap sheship jatyrmyz. Máselen, ótken jyly 300-ge jýyq jedel járdem kóligi satyp alyndy. Bıyl 800 dana satyp alýdy josparlap otyrmyz. Qalyptasqan jaǵdaıǵa baılanysty jedel járdem salasyn zamanaýı jabdyqtarmen qamtamasyz etýge de erekshe kóńil bólinip otyr. Jyl sońyna deıin taǵy 800-den astam kólik satyp alynbaq»,– dedi Baýyrjan Júsipov.
Onyń aıtýynsha, ústimizdegi jyldyń qańtar-mamyr aılary aralyǵynda jedel járdem brıgadalary 3 mıllıonǵa jýyq qońyraýǵa qyzmet kórsetken. «Ótken jylmen salystyrǵanda bul kórsetkish edáýir ulǵaıǵan. Elde jedel járdem qyzmetiniń júktemesi 40% artty»,– dedi ol.
Sonymen qatar, B.Júsipov júktemeniń artýyna baılanysty qyzmet kórsetý tártibiniń ózgergenin de tilge tıek etti. Máselen, naýqastyń ómirine qaýip tóngen jaǵdaıda brıgada 10-15 mınýtta jetedi. Al aıqyn qaýip bolmasa, kelý ýaqyty 60 mınýtqa deıin sozylady. Buǵan qosa, koronavırýs juqtyrǵandarǵa kómektesýdiń de óz algorıtmi bar.
