Almatyda jedel járdem shaqyrtý ne sebepti artqany túsindirildi
NUR-SULTAN. QazAqparat – Almaty qalalyq Qoǵamdyq densaýlyq saqtaý basqarmasynyń basshysy Kamaljan Nadyrov qalada jedel járdem qyzmetine qońyraý shalý sany eki ese artqanyn aıtty, dep habarlaıdy QazAqparat tilshisi.
«Epıdemııa bastalǵannan beri qalada jalpy 3 530 jaǵdaı tirkeldi. 2 178 adam saýyǵyp, emdelip shyqty. Qaıtys bolǵandar sany - 23. Búginde qala statsıonarlarynda 1 398 naýqas em alyp jatyr. Aýyrlyq dárejesi boıynsha óte aýyr hálde 19 adam, aýyr dárejede - 173, ortasha dárejede - 1044 jáne qanaǵattanarlyq jaǵdaıda 162 adam tirkelip otyr», - dedi K. Nadyrov Ortalyq kommýnıkatsııalar qyzmetindegi onlaın baspasóz qyzmetinde.
Osy oraıda ol qala boıynsha statsıonarlar men alǵashqy sanıtarlyq-medıtsınalyq kómek kórsetý uıymdarynda medıtsınalyq kómekti uıymdastyrý jumystary tolyqqandy júrgizilip jatqanyn jetkizdi.
«Tek ótken aptada aýrýhanalarǵa jatqyzý men jedel járdem qyzmetine qońyraý shalý sany eki ese artqan bolatyn. Naýqastar sanynyń ósýi sebebin qant dıabeti, júrek aýrýlary arterıaldy gıpertenzııa sııaqty aýrýlary bar patsıentterdiń kóbeıýimen baılanysty degen qorytyndyǵa kelip otyrmyz. Sondaı-aq, aýrýdyń aýyrlyǵy men patsıentterdiń jas arasyndaǵy baılanys anyq baıqalady, ıaǵnı jaı-kúıi aýyr jáne óte aýyr patsıentter arasynda 80 paıyzdan astamyn 60 jastan asqan adamdar quraıdy», - dedi basqarma basshysy.
Taldaý nátıjeleri boıynsha 20-29 jas aralyǵyndaǵy adamdar jıi juqtyratynyn kórsetip otyr, olarǵa aýrýǵa shaldyǵý jaǵdaılarynyń 35 paıyzy tıesili. Al 60 jastan asqan adamdar arasynda ınfektsııa juqtyrý kórsetkishi 8,8 paıyz deńgeıinde.
Onyń sózine qaraǵanda, jalpy dınamıkada derttiń aýyr jáne óte aýyr dárejede ótip jatqan naýqastardyń kóbeıýi baıqalady.
