Almatyda jedel járdem qyzmetiniń kelý ýaqyty 9 mınýtqa qysqardy

ALMATY. QazAqparat - Almatyda medıtsınalyq jedel járdem jumysy stantsııasynyń bazasynda «Tsıfrlyq Qazaqstan» memlekettik baǵdarlamasy aıasynda ahýaldyq ortalyq ashyldy, dep habarlaıdy QazAqparat tilshisi.

Qalalyq Qoǵamdyq densaýlyq saqtaý basqarmasynyń habarlaýynsha, endi jedel járdem stantsııalarynyń jumysy tolyq avtomattandyrylady.

«Turǵyndardyń «103» telefony boıynsha shaqyrtýlary birden aqparattyq júıege kelip túsedi. Onda jedeldilik sanattary boıynsha aqparat 3-ke bólinedi. 4 sanattaǵy shaqyrtýlar qalanyń tıisti emhanalaryna bekitilgen shuǵyl kómek kórsetý brıgadalaryna jiberiledi», - dedi habarlamada.

Mamandardyń aıtýynsha, ahýaldyq ortalyqtyń jumysy patsıentterge kelý ýaqytyn 28 mınýttan 18-ge deıin qysqartýǵa múmkindik berdi. Shaqyrtýdyń 1 sanatyna keletin bolsaq, jedel járdemniń kelý ýaqyty 9 mınýtqa deıin qysqardy.

Jalpy alǵanda, biryńǵaı ahýaldyq ortalyq shuǵyl jaǵdaılardy sheshýde qajetti basqarýshylyq jáne strategııalyq sheshimderdi qabyldaýǵa múmkindik beredi.

Aıta ketý kerek, Almatyda árbir jedel járdem brıgadasy jańa planshettermen jabdyqtalǵan. Bul patsıent týraly aqparatty jáne kez kelgen ilespe qujattamany elektrondyq formatta engizýdi qamtamasyz etýge múmkindik beredi.

Osylaısha, qalalyq aýrýhanalar medıtsınalyq qujattamany qaǵazsyz júrgizýge kóshti. Bul medıtsınalyq qyzmetkerlerdiń jumysyn jeńildetedi jáne ýaqyt únemdeıdi.

Sondaı-aq, ahýaldyq ortalyqta jaqyn arada 50 medıabordtan turatyn zııatkerlik aqparattyq navıgatsııalyq júıe ıntegratsııalandy.

Bul Almaty qalasynyń joldarynda jedel járdem brıgadasynyń jaqyndap kele jatqan kóligin ótkizip jiberý qajettigi týraly jol qozǵalysyna qatysýshylardy habardar etýge múmkindik beredi.