Almatyda jedel járdem qyzmetiniń avtoparki 70% jańardy
ALMATY. QazAqparat - Almaty jedel járdem qyzmetine jyl sońyna deıin qosymsha 100 jańa mashına jetkiziledi. Bul týraly Óńirlik kommýnıkatsııalar qyzmeti alańynda ótken onlaın brıfıng barysynda Almaty qalalyq jedel medıtsınalyq járdem stansasynyń bas dárigeri Birjan Ospanov aıtty, dep habarlaıdy QazAqparat tilshisi.
Buǵan deıin Almaty ákimi Baqytjan Saǵyntaev qalada 35 jańa jedel járdem kóligi satyp alynǵanyn aıtqan edi.
«Aldyńǵy qatarly álemdik brendterdiń zamanaýı, portatıvti quraldarymen jabdyqtalǵan 35 jańa avtokólik alyndy. Bıyl jyl sońyna deıin taǵy 100 jańa avtokólik kelip túsedi. Jedel medıtsınalyq járdem qyzmeti koronavırýs yq ınfektsııasynyń jazǵy tolqyny kezeńindegi jumys tájirıbesin eskere otyryp, materıaldyq-tehnıkalyq bazany jaqsartty», - dedi Birjan Ospanov.
Sondaı-aq, ol jedel járdem kóligin dezınfektsııalaýǵa erekshe nazar aýdarylatynyn aıtty. I jáne II eshelondardyń barlyq klınıkalarynda mashınalardy dezınfektsııalaý sýyq bý generatory ádisimen júrgiziledi.
«Patsıentti jetkizgennen keıin statsıonarlarda zamanaýı tehnologııany paıdalana otyryp, sanıtarlyq avtokólikti baılanyssyz «sýyq bý» generatory arqyly dezınfektsııalaý júrgiziledi. Oǵan 10 mınýt ýaqyt kerek. Osylaısha kóliktiń medıtsınalyq uıymdarda bolýyn 3 esege qysqartady», - dep atap ótti B. Ospanov.
COVID-19 jańa tolqynyna daıyndyq aıasynda dıspetcherlik qyzmet te kúsheıtildi. Jedel medıtsınalyq járdem qyzmetiniń aldyńǵy shebinde 365 dáriger, 1 388 feldsher jumys isteıdi.
Budan basqa, jedel medıtsınalyq kómek qyzmetiniń jumysyn jańǵyrtý boıynsha taǵy qosymsha sharalar qabyldandy. Brıgadalar sany 220-ǵa deıin artyp, MÁMS qory qarajaty esebinen 20 kólik rezervke qoıyldy.
Ákimdik qarajaty esebinen jeke kompanııalardyń 20 avtokóligi rezervke tartyldy.
Sonymen qatar, Almaty medıtsınalyq kolledji men Respýblıkalyq medıtsınalyq kolledj túlekterinen daıyndalǵan 60 erikti feldsher, jeke medıtsınalyq ortalyqtardyń 60 feldsheri daıyndalyp, aqparattyq-jedel dıspetcherlik bólimdi keńeıtý jáne 103 nomeri boıynsha qabyldaıtyn feldsherler sanyn 60-qa deıin kóbeıtý josparda bar.
Turǵyndardyń saýalyna jaýap berý úshin shuǵyl túrde 3000-505 Call-center ashyldy.
