Almatyda jedel járdem qyzmetin prokýratýra tekserip jatyr
ALMATY. QazAqparat - Almaty qalalyq qoǵamdyq densaýlyq saqtaý basqarmasynyń ókili Svetlana Sultanǵazıeva onlaın brıfıng barysynda prokýratýranyń qaladaǵy jedel járdem qyzmetin tekserip jatqanyn aıtty, dep habarlaıdy QazAqparat tilshisi.
Buǵan deıin, jedel járdem qyzmetkerleri jalaqylary ýaqtyly berilmeıtinine jáne basshylary jeke qorǵanys quraldaryn «qara bazarda» satatynyna shaǵymdanǵan bolatyn.
Brıfıng barysynda BAQ ókilderi Svetlana Sultanǵazıevadan osy máselege baılanysty suraq qoıdy.
Óz kezeginde densaýlyq saqtaý basqarmasynyń ókili istiń quqyq qorǵaý organdaryna tapsyrylǵanyn aıtty.
«Osydan biraz ýaqyt buryn jedel járdem qyzmetin arnaıy komıssııa tekserdi. Barlyq ister qosymsha tergeý úshin prokýratýraǵa tapsyryldy. Jedel járdem qyzmetkerleriniń shaǵymyna keletin bolsaq, aryz túskeni ras, biraq olar quqyq qorǵaý organdaryna berildi. Tergeý bastaldy, sondyqtan men qazir ol jaıynda aıta almaımyn», - dep jaýap berdi Sultanǵazıeva.
