Almatyda jazyqsyz qamalǵan 36 adam, onyń ishinde eki bala bostandyqqa shyqty
«Amanat» qoǵamdyq komıssııasynyń jáne Ulttyq keńestiń múshesi Ýaıs Ersaıynulynyń aıtýynsha, komıssııanyń maqsaty - qańtar oqıǵalarynan keıin qamaýǵa alynǵan kinásiz azamattardyń bostandyqqa shyǵýyna kómektesý.
«Almatyda qańtar oqıǵalarynan keıin kóptegen jazyqsyz adamdar ustalyp, qamalyp jatyr. Bul jaıt qazaqstandyqtardyń janyna qatty batty. Sondyqtan biz óz bastamamyzben «Amanat» qoǵamdyq komıssııasyn qurdyq. Biz halyqtyń úlken amanatyn arqalap otyrmyz», - dedi Ýaıs Ersaıynuly.
Qoǵamdyq komıssııanyń tóraǵasy Abzal Quspannyń aıtýynsha, kópshilik QR Qylmystyq kodeksiniń 272-baby boıynsha isti bolǵandardy bosatýdy surap otyr.
«Men Qylmystyq kodekstiń 272-baby 3 bólimnen turatynyn túsindirgim keledi. 272-baptyń 1-bóliminde - uıymdastyrýshylarǵa, 2-bóliminde - qatysýshylarǵa, 3- bóliminde - arańdatýshylarǵa jaza kózdelgen. Biz 272-baptyń 2-bólimine basa kóńil bólip otyrmyz, sebebi, kóp jaǵdaıda belgisiz uıymdastyrýshylar men arandatýshylardyń sózine erip, abaısyzda arandap qalǵan azamattar «qatysýshylar» bolyp sanalady», - dedi Abzal Quspan.
Sondaı-aq, onyń aıtýynsha, komıssııanyń aralasýymen Almatyda bir apta ishinde 36 adam bostandyqqa shyqty
«Shyǵarylǵan 36 adamnyń teń jartysy - jaralylar. 36 adamnyń ishinde 2 kámeletke tolmaǵan bala bar. Bizdiń tizimde bostandyqqa shyǵýy tıis taǵy 3 bala tur. Jalpy, biz jaralylar túgel bosatylýy kerek degen usynys aıtyp jatyrmyz», - dedi ol.
Komıssııa múshesi, advokat Mádı Myrzaǵaraevtyń aıtýynsha, qamaýda otyrǵan áıelder, 18-ge tolmaǵan balalar, jaraqat alǵandar, tonaý men urlyqqa qatyspaǵan, beıbit sherýge shyqqanazamattardyń qoǵamǵa eshqandaı qaýpi joq.
«Olar qylmyskerler emes, sebebi, olar qalany tonaýǵa qatysqan joq. Demek, olardy qoǵamǵa qaýipsiz dep sanap, tergeý aıaqtalǵanǵa deıin bas bultartpaý sharasyn ózgertip, qamaýdan eshqaıda ketpeý týraly qolhatqa aýystyrý qajet dep sanaımyz. Biz quqyq qorǵaý, prokýratýra organdarynyń aldynda osy máseleni qoıyp otyrmyz. Sebebi, jazyqsyz jandardyń bir kún bolsa da abaqtyda artyq otyrýy olar úshin azap»,- dedi advokat Mádı Myrzaǵaraev.
Sondaı-aq, ol «Amanat» komıssııasynyń atyn jamylyp, tergeý ızolıatorynyń janynda belgisiz bir top adamnyń júrgenin aıtty.
«Olar qamaýda otyrǵan azamattardyń ata-analary men týystaryna «biz Amanat komıssııasynanbyz, múshelerimiz» deıtin kórinedi. Olar muny qandaı pıǵylmen, ne maqsatpen aıtyp jatqany bizge belgisiz. Sol úshin azamattardy saqtandyrǵymyz keledi. Sebebi, qazirgi sátti paıdalanyp, óziniń bas paıdasyn oılaıtyn adamdar tabylýy múmkin. Men «Amanat» komıssııasynyń jumysy tegin, aqysyz, bizge eshqandaı marapat, syıaqy kerek emes ekenin eske salǵym keledi. Eger bireý «Amanat» komıssııasynyń múshesimin, sizge kómektesem, jaqynyńyzdy, týysyńyzdy shyǵaryp berem» dep ol úshin aqsha, syılyq surap, dámetetin bolsa, olarǵa aldanyp qalmańyzdar», - dedi ol.
Abzal Quspannyń aıtýynsha, komıssııa aldaǵy ýaqytta el óńirlerin aralaýǵa shyǵady.
«Semeı qalasyna Almaty qalasynyń turǵyny, belgili zańger Erlan Qalıev búgin jetti. Ol prokýratýra organdarymen birlese komıssııa atynan sonda jumys jasaıdy. Basqa óńirlerge ózimiz baryp, barlyq jaǵdaımen tanysyp, jumys júrgizetin bolamyz. Biz 200 adammen jeke kezdesip jáne olardyń is materıaldaryn qarastyrýdamyz. Biraq áli qarap úlgermegen materıaldar da bar. Óńirlerdi aralap bolǵan soń, Almatyǵa qaıta oralamyz. Biz tek qylmystyq istermen ǵana aınalysýdamyz», - dep qorytyndylady ol.
