Almatyda jazýshy Syrbaı Máýlenovtiń 95 jyldyǵyna arnalǵan saltanatty jıyn ótedi
ASTANA. QazAqparat - Almatyda belgili jazýshy Syrbaı Máýlenovtiń 95 jyldyǵyna arnalǵan saltanatty jıyn ótedi, dep habarlaıdy QazAqparat tilshisi.
Almatydaǵy Qazaqstan Jazýshylar odaǵynda Qazaqstannyń Halyq jazýshysy, Abaı atyndaǵy Qazaq KSR Memlekettik syılyǵynyń laýreaty, Aleksandr Fadeev atyndaǵy syılyqtyń laýreaty Syrbaı Máýlenovtiń 95 jyldyǵyna arnalǵan saltanatty shara uıymdastyrylmaq.
Sharanyń baǵdarlamasyna sáıkes, Qazaqstan aqyndary men jazýshylary, Qazaqstan Jazýshylar odaǵynyń basqarma tóraǵasy, QR Memlekettik syılyǵynyń laýreaty, Qazaqstan Respýblıkasyna eńbegi sińgen qaıratker Ulyqbek Esdáýletov sóz sóıleıdi. Qazaqstan Respýblıkasyna eńbegi sińgen qaıratker Esenǵalı Raýshanov Syrbaı Máýlenovtiń ómiri men shyǵarmashylyǵy týraly baıandama oqıdy. Shara qonaqtaryna arnap merekelik kontsert qoıylady.
Shara 15 maýsym kúni bolady.
Syrbaı Máýlenov 1922 jyly 17 qyrkúıekte Qostanaı oblysy, Jangeldın aýdany, Torǵaı kentinde týǵan. Ekinshi Dúnıejúzilik soǵysqa qatysqan. Abaı atyndaǵy Almaty memlekettik ýnıversıtetin bitirgen. 1943-1950 jyldary Qostanaı oblystyq radıokomıtetinde redaktor, «Bolshevıktik jol» gazetinde bólim meńgerýshisi, redaktordyń orynbasary, 1951-1955 jyldary Qazaq memlekettik kórkem ádebıet baspasynda redaktsııa meńgerýshisi, 1957-1961 jyldary Qazaqstan Jazýshylar odaǵynda ádebı keńesshi, «Qazaq ádebıeti» gazetinde bas redaktordyń orynbasary, 1964-1971 jyly «Juldyz» jýrnalynyń, 1971-1977 jyldary «Qazaq ádebıeti» gazetiniń bas redaktory boldy.
Tuńǵysh óleńi Jambyl oblysynyń «Kolhozshy» gazetinde 1937 jyly jarııalansa, «Óleńder» atty alǵashqy jınaǵy 1948 jyly jaryq kórdi.
Qyryqqa jýyq jyr jınaqtarynyń avtory. «Tańdaýly óleńder» atty tańdamalysy (1958), «Shańqaı tús» jınaǵy (1966), «Tańdamalylary» (2 tomdyǵy, 1972), 1982-1984 jyldary úsh tomdyq shyǵarmalar jınaǵy basylyp shyqty. Onyń «Jańa kóktem» (1956), «Dala tańy» (1957), «Kógildir taýlar» (1964), «Jer nári» (1970), «Aprel japyraqtary» (1972), «Tańdamaly lırıkalary» (1972), «Japyraqtar janady» (1972) óleńder jınaqtary orys tilinde Máskeýde basyldy.
«Jer nári» atty ádebı portretter men ocherkter jınaǵy (1966), respýblıka eńbekshileriniń halyq sharýashylyǵyn órkendetýdegi qajyr-qaıratyn kórsetetin «Úrker tóbede tur» (1971) kitaby, estelikter men portretter, etıýdter kitaby jaryq kórdi.
Balalarǵa arnap «Barlaýshy bala» (1961), «Qulynshaq» (1963), «Bala jolbarys» (1963), «Qorqaq torpaq» (1966), t.b. óleńder men áńgimeler jazdy. Orys jáne týysqan halyqtar ádebıeti shyǵarmalaryn qazaq tiline aýdardy.
