Almatyda jazýshy Sáýle Dosjanovanyń «Ógeı júrek» atty kitabynyń tusaýkeseri ótti
Saltanatty sharada jańa kitaptyń tusaýyn fılologııa ǵylymdarynyń doktory, professor Baqytjan Hasanov pen Qazaqstannyń Eńbek sińirgen qaıratkeri, Ekonomıka jáne bıznes joǵary mektebi fakýltetiniń dekany, ekonomıka ǵylymdarynyń kandıdaty Baıan Ermekbaeva kesti.
Tanystyrylym barysynda QR Prezıdenti Ákimshiligi Qazaqstan halqy Assambleıasy hatshylyǵynyń sektor meńgerýshisi Názıpa Shanaı: «Zııaly qaýym ókilderi búgingi qoǵamnyń rýhanı jaǵdaıyn kórsetip turatyn termometr tárizdi. Sondyqtan da Sáýle Maǵazbekqyzy syndy qalamy qarymdy jazýshylarmen kezdesip, oı bólisý, ásirese, jastar úshin bereri mol sát bolmaq. Sáýle Dosjanovanyń shyǵarmashylyǵy tunyp turǵan qazaq áıeliniń fılosofııasy der edim. Al qazaq áıeliniń qoǵamda alar orny aıryqsha ekenin ózderińiz de bilesizder. Ana óz aldyna bir mektep. Ultty tárbıeleýshi negizgi tulǵa da - ana. Al, áke qashan da úlgi. Olaı bolsa Sáýleniń búgingi tusaýy kesilgeli otyrǵan kitaby da ózge týyndylary ispetti qyz balalardyń bolashaq ana retinde qalyptasýyna septigin tıgizer asa qundy eńbek. Biraq bul sózim kitaptyń tek áıelderge arnalǵandyǵyn bildirmese kerek-ti. Otbasy shaǵyn memleket desek, sol memlekettiń birligin saqtaı otyryp, damytý jolynda bul kitaptyń er azamattarǵa da bereri mol. Osynaý rýhanı turǵydan kemeldenýge kómegin tıgizetin qundy dúnıe qoldaryna tıip otyrǵan búgingi jastar shynynda da baqyttty, - degen júrekjardy pikirin bildirdi.
«Jańa kitapty qolyma alyp paraqtaǵannan-aq, ondaǵy erekshelikter birden kózge shalyndy. Máselenkı, bul týyndyǵa engen hıkaıattardyń qaı-qaısysy da dıalogpen bastalǵan. Osy sózimizge dálel retinde kitaptyń taqyrybyna arqaý bolǵan «Ógeı júrek» hıkaıatynyń: «Osydan aman qalsam... Osydan aman qalsam... aman qalsam... aman qalsam...qalsam... qal...» dep bastalǵanyn aıtýǵa bolady»,-dep bastady óz sózin fılologııa ǵylymdarynyń doktory, professor Baqytjan Hasanov.
«Munyń ózi Sáýle Maǵazbekqyzy shyǵarmashylyǵynyń ózgege uqsamaıtyn bir qyry. Táńirdiń bergen talantynyń arqasynda tyń týyndylardy dúnıege ákelip, ony qalyń oqyrmanǵa usynyp otyrǵan Sáýle Dosjanova shyǵarmalarynyń jalpy jurtqa oı salary anyq. Oqyrmanǵa endi ǵana jol tartqan jańa týyndy da kitap súıer qaýymnyń aınymas serigi bolady dep senemiz».
«Ógeı júrek» atty bul kitapqa jazýshynyń «Ákemniń qupııa amanaty», «Aqbulaqtyń adasqaǵy», «Qyzmet qamaqtaǵy áıel», «Qulazý» atty hıkaıattary engen. Mundaǵy árbir týyndynyń kóterer júgi bar.
«Ógeı júrek» hıkaıaty Qazaqstan medıtsınasynyń zamanaýı jetistikterin qalyń oqyrmanǵa kórkem de túsinikti tilmen jetkizedi. Elimizde tuńǵysh ret jasalǵan júrek almastyrý operatsııasynyń sátti ótýi - ulttyq jetistik, ári otandyq medıtsınanyń álemdik deńgeıge kóterilgendiginiń aıqyn kórinisi. Hıkaıat Astanadaǵy Ulttyq ǵylymı kardıohırýrgııa ortalyǵynyń basshysy, kardıohırýrg, Eńbek Eri ıÝrıı Pıaǵa arnalǵan.
Kesh barysynda Sáýle Maǵazbekqyzy Qazaq ulttyq ýnıversıtetinen 28 jyl buryn túlep ushqanyn, ózi bilim alǵan qasıetti qarashańyraqqa kelip, tebirenip otyrǵanyn da jasyrmady. Júrekjardy jyrlarynan shashý shashyp qana qoıǵan joq, áýezdi únimen ádemi ándi áýeletip, kópshiliktiń kóńilin bir serpiltti.
Jıynǵa fılologııa ǵylymdarynyń doktory, professor Baqytjan Hasanov, QR Prezıdenti Ákimshiligi Qazaqstan halqy Assambleıasy hatshylyǵynyń sektor meńgerýshisi Názıpa Shanaı, «Almaty aqshamy» gazetiniń bas redaktory, belgili kósemsózshi Qalı Sársenbaı, Abaı atyndaǵy Qazaq ulttyq pedagogıkalyq ýnıversıtetiniń prorektory, fılologııa ǵylymdarynyń doktory, UǴA múshe korrespondenti Aqtolqyn Qulsarıeva, «Almaty aqshamy» gazetiniń bólim meńgerýshisi Nurjamal Baısaqalova, ýnıversıtet ustazdary men stýdent jastar qatysty.
