Almatyda jazýshy, bıolog ǵalym Maksım Zverevtyń 115 jyldyǵyna arnalǵan kórme ashyldy

Kórmege ǵalymnyń ómiri men shyǵarmashylyǵyna qatysty murajaı qoryndaǵy materıaldar,  2004 jyly M.Zverevtyń týysqandary tarapynan osynda turaqty paıdalanýǵa berilgen jeke tutyný zattary, qujattary, kitaptary men fotosýretteri jáne jumys kabınetine qatysty jeke zattary qoıylǵan.

 Kórmeniń ashylý saltanatyna M. Zverevtyń jaqyn týystary, jazýshynyń shákirtteri, Almaty haıýanattar baǵynyń qyzmetkerleri jáne mektep oqýshylary qatysty. Shara barysynda ǵalym týraly  derekti fılm kórsetilip, kelýshiler úshin  arnaıy ekskýrsııa uıymdastyryldy.

M.D. Zverev 1896 jyly 29 qazanda Barnaýyl qalasynda dúnıege keldi. 1923 jyly Tomsk ýnıversıtetin bitirip, 1937 jyldan bastap ómiriniń sońyna deıin Almaty qalasynda turdy.

 M. Zverev Qazaqstandaǵy balalar kórkem ádebıetine qalam sermegen alǵashqy jazýshylardyń biri. Ol «Ý lesnogo kostra», «Zolotoı saıgak», «Vstrechı v lesý», «Zapovednık pestryh gor», «Na egerskıh kordonah», «Hozıaın Nebesnyh gor», «Zaımka v borý» atty jáne basqa da kóptegen ádebı kitaptardyń avtory.

Ol tek jazýshy ǵana emes, úlken ǵalym bolǵan. Sondaı-aq, Almaty haıýanattar baǵynyń tájirıbeli jetekshisi jáne alǵashqy uıymdastyrýshylarynyń biri, «jas natýralıster» mektebiniń negizin salýshy bolyp tabylady.  Mamandyǵy boıynsha zoolog, ómiriniń barlyq kezeńine derlik tabıǵatty zertteýge jumsady jáne de onyń júzden asa eńbekteri jabaıy ańdar tabıǵatyn zertteýge arnalǵan.

 1956 jyly M. Zverevtyń stsenarııi boıynsha Almaty kınostýdııasy «Qanatty syılyqtar» atty alǵashqy balalar kórkem fılmin túsirdi.

Onyń  shyǵarmashylyq jáne qoǵamdyq qyzmeti joǵary  baǵalandy. Ol Qazaqstannyń halyq jazýshysy, Qazaqstan Memlekettik syılyǵy men Abaı atyndaǵy Memlekettik syılyqtyń laýreaty  jáne kóptegen ordender men medaldardyń ıegeri.