Almatyda jazýshy Beıbit Qoıshybaevtyń «Túnekten oralǵan esimder» atty tórt tomdyq kitabynyń tusaýy kesildi
Oǵan belgili qoǵam qaıratkerleri, tarıhshylar, qýǵyn-súrgin qurbandarynyń urpaqtary, BAQ ókilderi jáne basqa da múddeli tulǵalar qatysty, - dep habarlaıdy Ulttyq kitaphananyń baspasóz qyzmetinen.
Іs-sharany Sh. Ýálıhanov atyndaǵy Tarıh jáne etnologııa ınstıtýtynyń dırektory, tarıh ǵylymdarynyń doktory, professor Hankeldi Ábjanov pen halyqaralyq «Qazaq tili» qoǵamynyń vıtse prezıdenti, fılologııa ǵylymdarynyń doktory Ǵarıfolla Ánes júrgizdi.
«Jazýshy Beıbit Qoıshybaev ótken ǵasyrdaǵy ult-azattyq qozǵalysynyń kóshbasynda turǵan, 30-shy jyldardaǵy saıası qýǵyn-súrgin naýqanynyń qurbandaryna aınalǵan Álıhan Bókeıhanov, Baqytjan Qarataev, Mustafa Shoqaev, Jansha Dosmuhamedov, Ahmet Baıtursynov, Názir Tórequlov, Smaǵul Sádýaqasov, Sultanbek Qojanov, Turar Rysqulov, Temirbek Júrgenov, Dinmuhamed Ádilov syndy halqymyzdyń ondaǵan aıaýly uldarynyń ómiri men qyzmeti jaıynda ár jyldary jazǵan zertteý eńbekterin «Túnekten oralǵan esimder» atty tórt tomdyq kitabyna toptastyrdy», - delingen habarlamada.
Aıta ketelik, jazýshy Beıbit Qoıshybaev qazaq halqynyń tarıhyndaǵy «aqtańdaqtar» jaıynda sonaý ótken ǵasyrdyń 80-shi jyldarynyń ortasynda, bılik basyndaǵy kommýnıstik partııanyń jarııalylyq jáne qaıta qurý saıasaty óris alǵan shaqta qalam terbeı bastaǵan bolatyn. Ol ásirese saıası jazaǵa ushyraǵan tarıhı tulǵalar taǵdyryn zerttep, olardyń kúres joldaryn jańǵyrtýǵa erekshe kóńil bólgen qalamger. Bertin kele, zertteýlerin tereńdetip, jekelegen qaıratkerler jaıynda derekti derbes kitaptar shyǵardy. Búgingi tórt tomdyq eńbegi sol zertteýleriniń zańdy jalǵasy.
