Almatyda jazǵy kafeniń aýmaǵyna aǵash qulady
ALMATY. QazAqparat – Almatyda túngi ýaqytta «Akýnın» jazǵy kafesiniń aýmaǵyna aǵash qulady, dep habarlaıdy QazAqparat tilshisi.
Beınejazbaǵa túsip qalǵan oqıǵanyń vıdeosy jelide tarady.
Jelidegi jazba avtorynyń aıtýynsha, kafe janynan ótip bara jatqan jigit kafe ákimshiligin dámhana aýmaǵyna aǵashtyń qulaǵaly turǵanyn eskertken eken.
Almaty ákimdiginiń málimetinshe, 25 mamyr kúni saǵat 22:15-te Almaty qalasynyń qutqarý qyzmetine (AQQ) Abaı dańǵyly, 21 mekenjaıynda ornalasqan «Akýnın» jazǵy kafesiniń aýmaǵyna aǵashtyń qulaǵany týraly habarlama túsken.«AQQ jáne Medeý ákimdiginiń mamandary tekserý úshin baryp, qajetti jumystardy erteńgi kúni kúndiz júrgizý týraly sheshim qabyldady. Zardap shekkender joq. Búgin tańerteń shuǵyl ekıpaj mamandary aǵashty kesýdi bastady. Oǵan jeke quramnyń 4 qutqarýshysy men 1 tehnıka jumyldyryldy», - dep habarlady ákimdikte.
Sonymen birge, Almaty qalasy ekologııa jáne qorshaǵan orta basqarmasynyń qyzmetkerleri qulaǵan aǵashtyń dińin tekserýge shyqty.
«Aldyn ala vızýaldy tekserý barysynda aǵashtyń qanaǵattanarlyq jaǵdaıda ekendigi anyqtaldy. Onyń qulaý sebebin anyqtaý úshin ǵylymı qyzmetkerlerdi tarta otyryp, saraptama jasalady. Qorytyndynyń nátıjeleri keıin usynylatyn bolady», - dep habarlady Almaty ákimdiginiń baspasóz qyzmeti.
