Almatyda jazda bes bala terezeden qulap ketti
ALMATY. QazAqparat – Almatyda osy jazda kópqabatty úılerdiń terezelerinen bes bala qulap ketken. Bul týraly Almaty qalalyq TJD málim etti, dep habarlaıdy QazAqparat tilshisi.
Almaty qalalyq Tótenshe jaǵdaılar departamentiniń dereginshe, oqys oqıǵa saldarynan balalar túrli jaraqattar alyp, keıbiri kóz jumǵan.
«Bul kóbinese eresekter kúndiz-túni terezeler men balkondardy ashyq tastap ketken kezde oryn alady. Joǵary qabattan, ásirese 5 jasqa deıingi balalar qulap ketedi. Kishkentaılarǵa qazir bári qyzyq, olar qaýip degendi bilmeıdi», - dedi TJD.
2 tamyzda Medeý aýdanynda 4 jasar bala bes qabatty úıdiń 5-shi qabatynan qulady. Búldirshin jedel-járdem kelgenshe kóz jumdy. Dál sol kúni Áýezov aýdanynda eki jasar qyz terezege qoıylǵan torymen birge tómenge qaraı qulaǵan. Basynan jaraqat alǵan ol aýrýhanaǵa jetkizildi, qazir es-tússiz jatyr.
Osyǵan baılanysty, Almaty qalalyq Tótenshe jaǵdaılar departamenti ata-analarǵa qajetti erejelerdi aıtady.
«Balalar tereze 12,5 sm ashyq tursa tómenge qulap ketýi múmkin. Sondyqtan, terezege arnaıy qulyptar ornatqan jón. Balalarǵa terezelerden alys jerde oınaýdy túsindirip, úıretý kerek. Olardy únemi qadaǵalap otyrý qajet. Jándikterden saqtaıtyn torlarǵa senýge bolmaıdy», - dep tolyqtyrdy departamentegiler.
Sondaı-aq, mamandar qarapaıym jáne senimdi qurylǵy týraly aıtty.
«Arnaıy kabeldi jip terezelerdi keńinen ashýǵa múmkindik bermeıdi. Bul qurylǵyny plastıkalyq jáne aǵash terezelerge ornatýǵa bolady. Jeldetý kezinde de óte qolaıly. Bul tásil balalardyń qaýipsizdigin qamtamasyz etedi», - dep atap ótti tótenshe jaǵdaılar departamentinde.
