Almatyda jaz aılarynda qýraǵan tal-shilikterdiń órtený qaýpi arta túsedi - TJD
ALMATY. QazAqparat - Búgin Almatyda qalalyq Tótenshe jaǵdaılar jónindegi departamentte órt qaýpi bar kezeńniń, sýǵa shomylý maýsymynyń bastalýy jáne kiriktire nemese japsarlas salynǵan nysandar máselesi boıynsha baspasóz brıfıngi bolyp ótti.
«Órt qaýpi bar kezeń bastalyp, aýa temperatýrasy joǵarylaǵan saıyn qurǵaq shópterdiń órtený oqıǵalary da jıileı túsedi. Qýraǵan shópten shyqqan órt jaqyn mańdaǵy turǵyn úılerge ótip, adam ómiri men tabıǵatqa orasan zor zııan keltirýi múmkin. Mysaly, 2015 jyly órt sóndirýshiler qurǵaq aǵashtar men shópter jáne qoqystardyń órtenýi boıynsha 1 542 ret tilsiz jaýmen alysqan», - dedi Almaty qalalyq TJD memlekettik órt baqylaýy bólimi bastyǵynyń mindetin atqarýshy, azamattyq qorǵanys podpolkovnıgi Rústem Nııazov.
Odan basqa, mamandar departamenttiń órt qaýpi bar maýsymǵa daıyn ekendikterin bildirdi.
«Almaty qalalyq TJD órtti aldyn alý boıynsha sharalar keshenin ázirlep qoıdy. Ótken mamyr aıynda tikushaqtardyń kómegimen keń kólemdi oqý-jattyǵý ótkizilgen. Bul tikushaqtar arqyly órtti kóldeneń baǵytta da tik baǵytta da sóndire alady», - dedi R. Nııazov.
TJD mamandary Almaty aýmaǵynda qurǵaq japyraqtardy órteýge bolmaıtyndyǵyn taǵy da eskertti.
Eger de osyndaı derekter anyqtalyp jasta, azamattar ákimshilik jaýapqa tartylyp, olarǵa 10-20 aılyq eseptik kórsetkish kóleminde aıyppul salynady. Zańdyq tulǵalarǵa salynatyn aıyppuldar budan da kóp.
