Almatyda jaıaý júrginshini qaǵyp óltirgen júrgizýshi ustaldy
ALMATY. QazAqparat - Almatyda jaıaý júrginshini qaǵyp ketken kólik júrgizýshisi ustaldy, dep habarlaıdy «QazAqparat» tilshisi ІІD-niń baspasóz qyzmetine silteme jasap.
Eske sala keteıik, 16 aqpanǵa qaraǵan túngi 12-de adam ólimine sebep bolǵan jol-kólik apaty Almaty qalasynyń Áýezov aýdanynda boldy.
«Jaıaý júrginshi oqıǵa saldarynan qaza tapty. Jol-kólik apaty boıynsha eki kólik ıesi iske tartylyp otyr. Biri oqıǵa ornynda qalǵan «Shkoda» kóliginiń, ekinshisi sol jerden izin sýytqan «Toıota Kamrı» kóliginiń júrgizýshisi. Eki kólik te Saın kóshesimen soltústik baǵytqa qaraı ketip bara jatqan. Oqıǵadan soń birden jedel top qurylyp, izine tústi. Biz júrgizýshiniń kim ekenin birden anyqtadyq. Ol 1969 jyly týǵan Almaty qalasy Jetisý aýdanynyń turǵyny bolyp shyqty. Biz izdep barǵanda ol úıinde boldy. Ol «Saın kóshesinde ıt qaǵyp kettim» dep oılaǵanyn aıtty. Qazirgi ýaqytta «Toıota» kóliginiń júrgizýshisi Anyqtaý basqarmasyna berildi», - dedi Almaty qalasy ІІD Jergilikti polıtsııa basqarmasynyń Іzdeý bóliminiń basshysy, polıtsııa podpolkovnıgi Erik Nasyrbekov.
Almaty qalasy ІІD Anyqtaý basqarmasy basshysy, polıtsııa podpolkovnıgi Rýstam Ábdirahmanov atalǵan jol-kólik apaty boıynsha, QR QK 345-babynyń 3-bóligi boıynsha (kisi ólimine soqtyrǵan jol apaty) jáne QR QK 347-baby ( oqıǵa ornynan iz sýytý) boıynsha qylmystyq is qozǵalǵanyn aıtty.
