Almatyda jaıaý júrginshiler úshin qandaı kósheler abattandyrylady
ALMATY. QazAqparat - Bıyl Almatyda jaıaý júrginshilerdiń yńǵaıy úshin qaıta abattandyrylatyn kósheler belgili boldy, dep habarlaıdy QazAqparat tilshisi.
Búgin Almaty ákimi Baýyrjan Baıbek qaladaǵy jaıaý júrginshiler aımaqtaryn qaıta abattandyrý jóninde kóshpeli keńes ótkizdi.
Bıyl ár aýdanda 16 jaıaý júrginshi aımaǵy jasalady. Sondaı-aq Panfılov, Jibek joly, Gogol, Qabanbaı batyr kósheleri men Astana alańynda jaıaý júrginshilerge basymdyq berile otyryp, birqatar ózgerister engiziledi.
Qalada turǵyndar úshin jaıly aımaqtardy qurý, saıabaqtar men skverlerdi abattandyrý, jaıaý júrginshiler aımaqtaryn qaıta jóndeý, velojoldar salý jáne qoǵamdyq keńistikti bólip turatyn qorshaýlardy alyp tastaý boıynsha júıeli jumystar jalǵasýda.
Qalanyń Almaly aýdanyndaǵy Dúısenov kóshesiniń Arenskıı kóshesinen Gaıdar kóshesine deıingi aýmaǵy, Qarasaı batyr kóshesiniń Abylaı han kóshesinen Masanchı kóshesine deıingi bóligi tolyq abattandyrylady. Bostandyq aýdanynda Tımırıazev kóshesiniń Esentaı ózeninen Baıtursynov kóshesine deıingi (jalpy uzyndyǵy 2,5 shaqyrym) ýchaskesinde de jumystar júrip jatyr.
Joba boıynsha usaq tastar tóselip, aryqtar sozylady, ýrnalar qoıylyp, qorshaýlar jáne basqalary alynyp tastalady.
Bulardyń ornyna sport qurylǵylary, balalar alańdary paıda bolady. Aǵashtar otyrǵyzylyp, jasyl jelekti qorshaýlar, klýmbalar jasalady.
