Almatyda jaıaý júrginshiler aımaǵyn qurý jobasy qashan júzege asady
ALMATY. QazAqparat - Almaty qalalyq jasyl ekonomıka basqarmasy megapolıstiń ortalyǵyndaǵy ýaqytsha jaıaý júrginshiler aımaǵyn qurý jobasy sanıtarlyq shekteýler tolyq alynǵanan keıin ǵana júzege asyrylatynyn málim etti, dep habarlaıdy QazAqparat tilshisi.
«Jasyl ekonomıka basqarmasy polıtsııa departamenti jáne aýdandyq ákimdiktermen birlesip, jaıaý júrginshiler aımaqtaryn kólik qozǵalysynan bosatý máselesin pysyqtap jatyr. Birinshi kezeńde Almaly aýdanyndaǵy Bógenbaı batyr –Tóle bı –Qabanbaı batyr kóshelerindegi sharshy aımaq usynyldy. Joba epıdemıologııalyq jaǵdaı turaqtanǵan soń ǵana bastalady»,– dep habarlady basqarmadan.
Eske salaıyq, Almaty qalasynyń ákimi Baqytjan Saǵyntaev maýsym aıynda jaıaý júrginshilerdiń ýaqytsha aımaqtaryn qurý boıynsha pılottyq jobanyń qolǵa alynǵanyn aıtqan bolatyn.
Keıinirek Almaty qalalyq Jasyl ekonomıka basqarmasynyń bastyǵy Natalıa Lıvınskaıa bul kóshelerde ekologııalyq ahýaldy jaqsartý boıynsha keshendi sharalar usyndy.
