Almatyda jaıaý júrginshi jolynda balalardy qaǵyp kete jazdaǵan júrgizýshi aıyppul tóleıdi
ASTANA. QazAqparat - Almatyda jaıaý júrginshi jolynda balalardy qaǵyp kete jazdaǵan júrgizýshi aıyppul tóleıdi. Bul týraly QR ІІM Ákimshilik polıtsııasynyń resmı ókili Irına Lýkıanına Feısbýktegi paraqshasynda jazdy, dep habarlaıdy QazAqparat tilshisi.
«Atalǵan fakti boıynsha avtomobıl júrgizýshisi Ákimshilik quqyq buzýshylyq týraly kodekstiń 596 baby 1 tarmaǵy boıynsha ákimshilik jaýapkershilikke tartyldy. Hattama toltyrylyp, 15 AEK kóleminde aıyppul salyndy», - dep jazdy ol.
Buǵan deıin habarlaǵanymyzdaı, Lexus kóligin mingen áıel joǵary jyldamdyqpen jaıaý júrginshi jolymen júrip, balalardy qaǵyp kete jazdaǵan bolatyn. Oqıǵa Almatynyń Tımırıazev kóshesi boıynda oryn alǵan.
