Almatyda «Jaıaý saldyń jaýharlary» atty dástúrli án keshi ótedi
ALMATY. 17 aqpan. QazAqparat - Almatyda 26 aqpanda Ǵ.Músirepov atyndaǵy Qazaq memlekettik akademııalyq balalar men jasóspirimder teatrynda «Jaıaý saldyń jaýharlary» atty dástúrli án keshi ótedi. Sharanyń uıymdastyrýshylary
- «Alash aınasy» men «Adyrna» ulttyq-etnografııalyq birlestigi.
Jaıaý Musanyń ánderi shyrqalatyn keshke Jolaman Qujımanov, Ramazan Stamǵazıev, Erlan Tóleýtaı, Tileýles Qurmanǵalı, Erkin Nurhanov, Erkin Shúkimanov, Erlan Rysqalı syndy dástúrli án óneriniń sańlaqtary qatysady. Kesh barysynda sondaı-aq, T.Júrgenov atyndaǵy Qazaq ulttyq óner akademııasynyń teatr óneri fakýltetiniń stýdentteri sal-seriler ómirinen shaǵyn qoıylym kórsetedi. Sonymen qatar, keshte sońǵy kezderi múlde aıtylmaı, tek muraǵattarda notasy shań basyp qalǵan Jaıaý Musa ánderi oryndalatyn bolady. Keshti Jaıaý Musa shyǵarmashylyǵy men ómirimen jaqsy tanys ónertanýshy, dúldúl ánshi Erlan Tóleýtaı júrgizedi.
«Jobanyń maqsaty - ulttyq mýzyka men halyq kompozıtorlarynyń taǵylymdy ómirin, qazaqtyń ulttyq qundylyqtaryn nasıhattaý bolyp tabylady», - deıdi uıymdastyrýshylar.
Atalmysh sharany uıymdastyrýshy - «Adyrna» ulttyq-etnografııalyq birlestigi Almaty qalasynda 2010 jyldan beri Birjan sal, Aqan seri, Muhıt ánderinen respýblıkalyq deńgeıdegi kontsertter uıymdastyryp keledi. Aldaǵy ýaqytta birlestik «Sal-seriler murasy» atty jobasy negizinde Úkili Ybyraı, Balýan Sholaq, Estaı, Áset, Mádı, Kenen ánderinen kesh ótkizýdi josparlaýda.
Keshke «Jas-Aı» shyǵys-tıbet medıtsınalyq ortalyǵy, T.Júrgenov atyndaǵy Qazaq ulttyq óner akademııasy jáne «Asyl kitap» baspasy demeýshilik jasap otyr.
Keshtiń bastalýy saǵat 18.00-de.
