Almatyda jaıaý adamdy qaǵyp óltirgen trolleıbýs júrgizýshisine sot úkimi shyqty
ALMATY. QazAqparat - Almatyda jaıaý júrginshini qaǵyp óltirgen trolleıbýs júrgizýshisine sot úkimi shyqty, dep habarlaıdy QazAqparat.
Bostandyq aýdanynyń №2 sotynda trolleıbýs júrgizýshisi Şepın atty azamatqa qatysty is qaraldy. Oǵan jol erejesin buzyp, abaısyzda kisi óltirý aıyby taǵylǵan.
Qylmystyq is onlaın rejımde qaraldy. Sot protsesi kezinde aıyptalýshy kinásin tolyq moıyndap, jasaǵan isine ókinetinin aıtty. Memlekettik aıyptaýshy júrgizýshini 2,5 jylǵa bas bostandyǵynan aıyrýdy ótindi.
Sot úkimimen Şepın QR Qylmystyq kodeksi 345-baby 3-bólimi boıynsha aıypty dep tanylyp, 2,5 jylǵa sottaldy. Ol jazasyn qaýipsizdigi tómen mekemede óteıdi.
Sondaı-aq jábirlenýshi tarapqa «Almatyelektrotrans» jaýapkershiligi shekteýli seriktestigi 2 877 704 teńge kóleminde materıaldyq ótemaqy tóleýi tıis. Al moraldyq zııan keltirgeni úshin 3 mln teńge tólenedi.
Úkim zańdy kúshine engen joq.
Eske sala keteıik, bul oqıǵa bıylǵy 5 aqpan kúni bolǵan. №12 baǵyttaǵy trolleıbýs Sátbaev kóshesiniń boıymen jolaýshysyz avtoparkke qaraı bet alǵan. Júrgizýshi Rozybakıev kóshesine jetpeıtin tusta turǵan Lexus GS 300 jáne Honda Accord markaly eki kólikti soqqan.
«Rozybakıev kóshesine jetkende onyń qan qysymy kóterilip, esinen tanyp qalǵan. Sóıtip kóshede turǵan Lexus GS300 jáne Honda Accord kólikterin soǵyp, trotýarǵa shyǵyp ketken jáne jaıaý adamdy qaqqan. Oqıǵa ornyna polıtsııa qyzmetkerleri, tasymaldaýshy kompanııa ókilderi, jedel járdem keldi. Kelgen dárigerler jaıaý júrginshige medıtsınalyq kómek kórsetti, biraq er adam aýyr jaraqattan sol jerde qaıtys boldy. Marqumnyń otbasyna ótemaqy tólenedi», - dep túsindirdi «AlmatyElektrotrans» AQ.
