Almatyda jaýynǵa arnalǵan káriz júıesi jasalmaq

ALMATY. QazAqparat  - Almatyda Urban forum ókilderi men qalalyq Sáýlet jáne qala qurylysy basqarmasy 2019 jylǵy jumys josparymen bólisti, dep habarlaıdy QazAqparat tilshisi.

Basqarmanyń habarlaýynsha, búginde qalada qaıta jasaý boıynsha jobalardyń kópshiligi saraptamadan ótip jatyr.

ArhKod jobasynyń ókili Devıd Kamınskı Jibek joly, Qazybek bı, Qonaev kóshelerin qaıta jasaý kezinde nóser sýy aǵatyn káriz júıesi eskerilmegenin alǵa tartty.

Qala bıligi jaýyn jaýǵan kezde qalanyń ortalyǵyn jıi sý basyp qalatynyn alǵa tartty.

«Qazir aryqtar jaýynǵa qatysty káriz júıesi retinde de, sýǵarý júıesi retinde de jumys istep tur. Al, qala kósheleriniń betinen kóp hımııalyq zııandy zattar aryq sýymen topyraq sýǵarýǵa ketedi. Osylaısha biz topyraqty ýlap jatyrmyz. Sondyqtan, 2019 jyly jaýyn kárizi júıesin jasaý kerek. Bul jaǵdaıda jaýyn sýy eginge ketetin aryq sýynan bólek aǵatyn bolady», - dedi Devıd Kamınskı.

Qalalyq basqarma basshysynyń orynbasary Almashan Ahmedjanovtyń aıtýynsha, bul másele kezeń-kezeńimen sheshýdi talap etedi.

«Jaýyn káriz júıesi qalaǵa óte kerek. Oǵan aqsha salý kerek. Onsyz bolmaıdy. Ony jasaý úshin jaýyn sýy qaıda baratyny, qaıda jınalatyny, qalaı tazalanatynyn oılastyrý kerek. Qalaı desek te, jaýyn sýy qalanyń tómengi aýdandaryna ketedi», - dedi Almashan Ahmedjanov.

Onyń paıtýynsha, 1970 jyldary Almatyda jaýyn júıesi bolǵan. Biraq, ony júrgizý, taza ustaý kóp qarjy talap etken soń júıe Keńes odaǵy ydyramaı turyp qaraýsyz qalǵan.