Almatyda jaýyn-shashyn saldarynan sońǵy úsh kúnde 402 sý basý oqıǵasy tirkeldi - TJD
ALMATY. QazAqparat - Almatyda jaýyn-shashyn saldarynan sońǵy úsh kún ishinde 402 sý basý oqıǵasy tirkeldi. Bul týraly búgin Almatyda ótken arnaıy baspasóz máslıhaty barysynda Almaty qalalyq TJD bastyǵynyń orynbasary Nurlan Madııarov málim etti.
«Almatyda ótken 16 mamyrda nóser jaýynǵa baılanysty «Qazgıdromet» memlekettik mekemesiniń eskertpesin negizge ala otyryp, biz qala turǵyndaryna SMS habarlama tarattyq. Kúni búginge deıin turǵyndar tarapynan sý basýǵa baılanysty 400-deı qońyraý shalyndy. 16 mamyrdan beri kúni búginge deıin 402 sý basý faktisi tirkeldi. Qazir sý basý faktilerin joıý jumystary jalǵasýda. Oǵan 519 adam, 94 tehnıka jáne 18 sýsorǵysh jumyldyryldy. Qalada aryq-ózen jelileri tolyǵymen tazartylǵan. Sondyqtan, sýdyń aryq-ózen arnalarynan tasýy nóser jaýynnyń saldarynan boldy», - dedi óz sózinde N. Madııarov.
Aıta ketelik, mamyr aıynda bolǵan jaýyn-shashynnyń mólsheri 198 mm-di qurady. Al bul, aılyq mólsherden eki ese kóp.
