Almatyda jataqhanalar sany artady
ALMATY. QazAqparat - Almatyda jastarǵa arnalǵan jataqhanalar salyna bastaıdy, dep habarlaıdy QazAqparat tilshisi.
Qala bıligi jastar men stýdentterge arnalǵan jataqhanalardy turǵyzý boıynsha aýqymdy sharany iske qosýdy josparlap otyr.
«Qalada 70 myńnan astam stýdent, 30 myń jas otbasy bar. Áleýmettik túıitkilderdi, sonyń ishinde baspana máselesin sheshý úshin jastardy baǵasy jaǵynan qoljetimdi arendalyq baspanamen qamtamasyz etý boıynsha jańa aýqymdy sharany bastaımyz. Mysalǵa, 4 adamǵa arnalǵan jataqhana bólmesi aıyna 25 myńnan 50 myńǵa deıin bolady», - dedi Almaty ákiminiń orynbasary Erlan Áýkenov áleýmettik baspana qurylysynyń jobasyn tanystyrý barysynda.
Joba avtorlary áleýmettik ýaqytsha baspana «Jas otaý» baǵdarlamasy jáne «2017-2020 jyldarǵa arnalǵan Jastardy qoldaý jol kartasy» aıasynda turǵyzylatynyn atap ótti. Jataqhanalar tek qana stýdentterge, jastar men 35 jastan aspaǵan otbasylarǵa arnalǵan.
Baǵdarlama shartyna sáıkes, seriktes retinde JOO-lar, ıelikterinde bos jer ýchaskesi jáne qajetti qarajattyń bir bóligi bar qurylys jáne kommýnaldyq mekemeler shyǵa alady. Qurylysty qarjylandyrýdyń bir bóligin «Almaty» áleýmettik-kásipkerlik korporatsııasy óz moınyna alady.
