Almatyda jataqhanadan órt shyǵyp, bir adam qutqaryldy
ALMATY. QazAqparat – Almatyda jataqhanadan órt shyǵyp, bir adam qutqaryldy, dep habarlaıdy QazAqparat tilshisi.
Qalalyq Tótenshe jaǵdaılar departameniniń málimetinshe, 14 jeltoqsan kúni 12 :42 -de Jetisý aýdanyndaǵy Angarskaıa kóshesinde órt shyqqany týraly habar kelip túsken.
«Órt sóndirýshiler saǵat 12:49 kelgende 3 qabatty ǵımarattyń 1 qabatynda ornalasqan qoıma janyp jatqanyn anyqtady. Ekinshi jáne úshinshi qabatta jataqhana ornalasqan. Turǵyndardyń kópshiligi syrtqa ózderi shyqty, biraq jataqhana dálizindegi qoıý tútinnen 48 jastaǵy turǵyn aıaǵyndaǵy jaraqatqa baılanysty ózdiginen syrtqa shyǵa almaǵan. Órt sóndirýshiler zardap shegýshini maska kıgizip syrtqa alyp shyǵyp, jedel járdem brıgadasyna tabystady», - dep habarlady vedomstvadan.
Órt 80 sharshy metr aýdandy sharpyǵan.
Órtti sóndirýge jeke quramnan 60-tan astam qyzmetker, gaz-tútinnen qorǵaý qyzmetiniń 6 toby jáne 15 tehnıka jumyldyryldy.
