Almatyda jasyl jelekterdiń tizimi jasalyp jatyr
ALMATY. QazAqparat - Almaty qalasynyń ekologııalyq problemalaryn talqylaýǵa arnalǵan kezdesý barysynda jasyl jelekterdiń róli talqylandy, dep habarlaıdy QazAqparat tilshisi.
Qazirgi tańda, Almatyda jasyl jelek alańdarynyń aýdany - 1 427 gektar. Al aǵashtardyń sanyn 2,2 mln.
Ekologııalyq retteý jáne baqylaý komıtetiniń tóraǵasy Zýlfýhar Joldasovtyń aıtýynsha, bul kórsetkishti 2 myń gektarǵa jetkizý qajet. Al aǵashtardyń sanyn 3 mıllıonǵa deıin kóbeıtý kerek.
«Aǵashtar - bul jalǵyz tabıǵı fıltr. Sondyqtan qorshaǵan ortanyń sapasyn jaqsartý úshin apattyq jáne sanıtarlyq jaǵdaılardy qospaǵanda, aǵashtardy kesýge tyıym salyp, jaýapkershilikti kúsheıtý kerek», - dep atap ótti ol.
Mamandardyń aıtýynsha, bir adamdy ottegimen qamtamasyz etý úshin 1,54 aǵash qajet. Bir aǵash bir avtokólikten shyqqan shyǵaryndylardy sińiredi. Bir aǵash 80 keli zııandy zat pen 20 keli shańdy zalalsyzdandyrady.
Óz kezeginde, Almaty qalasynyń jasyl ekonomıka basqarmasynyń bastyǵy Natalıa Lıvınskaıa megapolıste jasyl jelekterdiń aýmaǵyn ulǵaıtý mindeti turǵanyn atap ótti.
«Biz qalanyń jasyl qoryn arttyrý josparyn júzege asyryp jatyrmyz. 3 jyl ishinde qala aınalasynda 1 mıllıonǵa jýyq jasyl jelek otyrǵyzylady. Bıyl biz 250 myń aǵash otyrǵyzamyz. 2016 jyly jasyl jelekterdi túgendeý jumystary qolǵa alyndy. Osy málimetter negizinde jasyl jelekterdiń tizilimi jasalady. Biz jyl sońyna deıin jumysty aıaqtap, kelesi jyldyń basynda usynamyz», - dedi Natalıa Lıvınskaıa.
