Almatyda jasyl jelek derekteriniń bazasy jasalady
ALMATY. QazAqparat - Almatyda jasyl jelek derekteriniń bazasy jasalady. Bul týraly Baqytjan Saǵyntaev «Almaty» telearnasyndaǵy kezekti tikeleı efır barysynda málim etti, dep habarlaıdy QazAqparat tilshisi.
Ákimniń aıtýynsha, «jasyl qala» mártebesin saqtaý úshin ár aǵashtyń tólqujatyn ázirleý boıynsha jumystar júrgizilip jatyr.
«Bul qalanyń jasyl qoryn tıimdi basqarýǵa múmkindik beredi. Ol úshin elektrondyq esepke alý júıesi engizilýde, 2,3 mıllıonnan astam aǵashty túgendeý jáne pasporttaý júrgizilýde. Júıe aǵash otyrǵyzatyn alańdarǵa, onyń ishinde qalpyna keltiriletin jasyl alqapqa monıtorıng júrgizýge múmkindik beredi»,- deıdi shahar basshysy.
Sonymen qatar, ol Almatyda tsıfrlandyrý damyǵan kezde túrli aqparattyq júıeden málimetter jınaqtalady, olardy qala ıgiligi úshin basqarý kerektigin aıtty.
Osyǵan oraı úsh úlken tapsyrmany sheshýge múmkindik beretin biryńǵaı málimetter bazasy jasalady, olar:
- alda turǵan mindetterdi sheshý úshin basqarýdyń tsıfrlyq negizdegi derekter bazasyn qurý;
- qalanyń túrdi basqarmalary arasynda aqparat almasý jónindegi jumysty yńǵaıly jáne jyldam etý;
- ІT alańy, qorǵalǵan orta arqyly paıdalanýshylardyń málimetter negizinde jańa jobalardy jasaýlary úshin syrtqy paıdalanýshylarǵa málimetter berý.
