Almatyda jasyl keńistikti kútip ustaýda jaýyn-shashyn sýy kádege jaratylmaq

ALMATY. QazAqparat – Búgin Almatyda megapolıstiń bas josparyn talqylaýdyń úshinshi kúni ótti, dep habarlaıdy QazAqparat tilshisi.

Jıyn barysynda «Eko Almaty» JShS dırektory, jasyl keńistik boıynsha sarapshy Aqbota Myrzalıeva Almatyda keıingi jyldary qalanyń jasyl keńistigi nasharlap ketkenin aıtty.

«Sońǵy jyldary álem boıynsha ekologııalyq ózgeristerge baılanysty Almatynyń jasyl keńistigi nasharlaǵan. Sondaı-aq, jasyl keńistikti kútip ustaýdaǵy bizdiń burynǵy ádisimiz óz mańyzdylyǵyn joıdy. Osyǵan baılanysty jańa tehnologııany qoldanyp, qalaǵa jaýyn-shashyn mol jaýatynyn eskerýimiz qajet. Ol boıynsha qazir baǵdarlama ázirlený ústinde. Sol arqyly qalaǵa túsetin mol jaýyn-shashyndy biz jasyl keńistikterdi sýǵarý úshin de paıdalanatyn bolamyz», - dedi Aqbota Myrzalıeva.

Onyń aıtýynsha, qazirgi tańda Almatyda aryq júıleriniń tek 11%-ǵana jumys istep tur.

«Almatyda óziniń aryq júıesi bar. Alaıda, búgingi kúni onyń tek 11%-y ǵana istep tur. Degenmen, qazir jańa aryq júıelerin, kanaldar, magıstarldyq kanaldardy salý, qaıta salý jumystary júrgizilip jatyr. Munyń bári jaqsy, sebebi qalanyń jasyl keńistigi sapaly sýǵarýǵa baılanysty. Men búgingi talqylaýda osy máseleler talqylanyp, sheshimin taýyp jatqanyna qýanyshtymyn», - dedi sarapshy.

Ol Almatyda turǵyndar sanyna qaraı jasyl keńistik aýmaǵy durys bólinbegenin aıtty.

«Birikken Ulttar Uıymynyń statıstıkasy boıynsha bir adamǵa 30-50 sharshy metr jasyl keńistik qajet. Bizdiń elimizdegi normalar boıynsha bir adamǵa 10 sharshy metr. Degenmen, Almatyda bul normalar saqtalmaıdy. Sebebi, qalanyń ár aýdanynda bul sandar ártúrli. Mysaly, Medeý aýdanynda bir adamǵa 17 sharshy metr, Alataý aýdanynda 5-7 sharshy metr dep esepteledi. Demek, bizde bir adamǵa jasyl keństikter durys bólinbegen. Menińshe bul máseleni jańa saıabaq, skver, rekreatsııalyq aýmaqtardy salý, sý býlvary, sý qoımasy, ózen arnalary, avtojoldardyń boıyn abattandyrý arqyly sheshe alamyz dep oılaımyn», - dedi ol.

Eske salaıyq, Almatyda qalanyń jańa bas josparyn talqylaý 25 qańtarda bastalǵan bolatyn. Basty maqsat – qalanyń barlyq aýdanynda jaıly orta qurý jáne ómir súrý sapasyn arttyrý boldy.