Almatyda «Jasyl el» aıasynda 2 myńnan astam jas jumyspen qamtylady
Almatynyń ortalyq mádenıet jáne demalys saıabaǵynda ótken saltanatty jıynǵa jastar kóp jınaldy.
«Jasyl el» jobasy elimizde 2005 jyly bastaý aldy.
Onyń maqsaty - qalany abattandyrý, kóshetter egý, kógaldandyrý bolýdan bólek, jastar arasynda jumyssyzdyq deńgeıin azaıtý.
Bul týraly QazAqparat tilshisine «Jasyl el» jobasynyń Almaty qalasy boıynsha jetekshisi Zýhra Imanbaeva aıtyp berdi.
«Jasyl el» jobasy aıasynda ótken jyly 1900 jas jumyspen qamtylsa, bıyl 14-35 jas arasynda 2100 jasty jumyspen qamtý josparlanyp otyr. «Jasyl el» jobasy qalada jaz mezgilinde, ıaǵnı, maýsym, shilde, tamyz aılarynda ótedi. «Jasyl eldiń» quramyndaǵy árbir jas aı saıyn 70 myń teńge jalaqy alady. Búgingi saltanatty jıynǵa maýsym aıynda tirkelgen jastar qatysyp otyr. Olardyń arasynda joǵary oqý oryndary, kolledj stýdentteri men jumyssyz jastar bar», - dedi Zýhra Imanbaeva.
Onyń sózinshe, qalada jas ekopatrýlder qurylady.
«Jasyl el» jobasy aıasynda ekologııalyq semınar-trenıngter, ekologııalyq aktsııalar ótetin bolady. Sondaı-aq, jas ekopatrýlder qurylady. Olar qala aýmaǵyndaǵy ekologııalyq quqyqbuzýshylyqty anyqtaıdy, ıaǵnı, reıdter júrgizetin bolady. Jalpy, joba aıasynda qalanyń barlyq aýdanynda tazalyq jumystary júredi», - deıdi «Jasyl el» jobasynyń jetekshisi.
Abaı atyndaǵy Qazaq ulttyq pedagogıkalyq ýnıversıtetiniń 4 kýrs stýdenti Dana Bildebaeva «Jasyl el» jobasyna qatarynan tórtinshi jyl qatysyp keledi.
«Jasyl elge» kelgeli kóp dostar taptym. Onyń ústine qalanyń tazalyǵyna úlesimdi qosatynyma óte qýanyshtymyn. Ata-anam da osy jobaǵa qatysyp júrgenime dán rıza», - deıdi ol.
«Jasyl el» jobasy birinshiden ásem qalamyzdy kógaldandyrý boıynsha jastarǵa berer tárbıelik mańyzy zor, ekinshiden jataqhana tegin bolady, úshinshiden 70 myń teńge aılyq alady.
Bul týraly Abaı atyndaǵy Qazaq ulttyq pedagogıkalyq ýnıversıtetiniń 2-kýrs stýdenti Alshyn Abdıkamal aıtty.
«Osynyń bári biz úshin úlken kómek. Almaty - elimizdegi tabıǵaty ásem qalanyń biri. Biz bolsaq sol ásem tabıǵatty saqtaýǵa óz úlesimizdi qosamyz», - dedi Alshyn Abdıkamal.
