Almatyda jasy 65-ten asqandar men balalardyń densaýlyǵy tegin tekseriledi
ALMATY. QazAqparat – Almaty ákimi Baqytjan Saǵyntaevtyń tapsyrmasymen COVID-19 ekinshi tolqynyna daıyndyq aıasynda qalada balalar men qart adamdarǵa tegin profılaktıkalyq tekserý júrgizilýde. Bul týraly №19 qalalyq emhananyń bas dárigeri Kámshat Aıtqazına onlaın brıfıng barysynda aıtty, dep habarlaıdy QazAqparat tilshisi.
Kámshat Aıtqazınanyń aıtýynsha, qalada halyqtyń áleýmettik jaǵynan eń álsiz toptaryn tekserýmen qamtý týraly sheshimi qabyldanǵan. Birinshi kezekte, bul kóptegen sozylmaly aýrýy bar jasy úlken adamdar toby (65 jáne odan joǵary jastaǵy) jáne 16 jasqa deıingi balalar qamtylady.
Túrksib aýdanynda 7 medıtsınalyq uıym jumyldyrylǵan, onda 242 081 adamǵa qyzmet kórsetiledi, onyń ishinde 16 jasqa deıingi 66 460 bala bolsa , 65 jastan asqan 20 918 adam bar. Dıspanser esebindegi topta 15 543 eresek jáne 12 712 bala bar.
«Medıtsınalyq uıymdarmen birinshi kezekte nysanaly toptar qurylyp, mýltıdıstsıplınarly komanda quramy bekitilip, arnaıy úıge shaqyrtý boıynsha barý kestesi jasaldy», - dedi bas dáriger.
Osylaısha, 12 760 balany jáne 65 jastan asqan 11 700 adamdy tekserý josparlanǵan.
Onyń ishinde kópbalaly otbasylardan - 608 bala. Jalǵyz basty ana tárbıesindegi - 104 bala. Múmkindigi shekteýli - 415 bala bar.
«65 jastan asqan adamdardy tekserý úshin jalpy tájirıbelik dáriger medbıkesimen, nevropatolog, kardıolog, otolarıngolog mamandar, balalar úshin pedıatr dáriger, nevropatolog, okýlıst, otolarıngolog, balalar hırýrgi bar brıgadalar quryldy. Patologııa anyqtalǵan jaǵdaıda, patsıentter esepke alynyp, densaýlyǵynda anyqtalǵan kemshilikke baılanysty, em taǵaıyndalady»,– dedi Kámshat Aıtqazına.
Naýryz aıynan tamyzǵa deıin karantın shekteýi engizilgenin eskere otyryp, kóptegen naýqastar merzimdi dıspanserlik tekserýden ýaqytyly óte almady, sol sebepti bir jaǵynan tolyqtaı tekserý júrgizý, ıaǵnı, flıýrografııa, ish qýysy organdaryn jáne búırekti ýltradybystyq tekserý, jalpy qan taldaýy, jalpy zár taldaýy, qannyń bıohımııalyq taldaýy, arterııa qysymy men kóz qysymyn ólsheý júrgizý josparlanǵan.
«Aýrý belgisi boıynsha qart adamdarǵa kúndizgi statsıonarda, úı statsıonarynda em taǵaıyndalady, sonymen birge, tegin dári jetkiziledi», - dep atap ótti K. Aıtqazına.
Nysanaly top pen qaýipti toptaǵylar COVID-19 juqtyrýǵa áldeqaıda beıim ekenin eskere otyryp, mýltıdıstsıplınarlyq toptar aqparattyq jumysqa erekshe nazar aýdarýda.
Budan basqa, halyqty koronavırýs ınfektsııasynyń jeke jáne qoǵamdyq aldyn alý sharalary týraly aqparattandyrý emhanalardyń saıtynda, áleýmettik jelide jáne qoǵamdyq orynda aqparat, beınerolık ornalastyrý arqyly júrgiziledi.
