Almatyda jastarǵa arnalǵan qazaq tildi mádenı "Ekpin" jobasy tanystyryldy
ALMATY. 22 aqpan. QazAqparat - Búgin Almatyda Qazaqstannyń Yvision.kz iri blog-tuǵyrnamasy jastarǵa arnalǵan qazaq tildi mádenı "Ekpin" jobasyn kópshilikke tanystyryp, tusaýyn kesti.
Shara barysynda jańa onlaın-jýrnaldyń komandasy jobanyń mańyzdylyǵy men jýrnalda jaryq kóretin jazbalardyń keıipkerleri jóninde, sonymen birge, ınternette kontenttik jobalardy monetızatsııalaýdyń ádisterimen syr bólisti.
Saıt redaktory Álııa Sembaıdyń aıtýynsha, rýnette Look at me, The Village, Theory & Practice sııaqty life style jobalary jastar arasynda burynnan tanymal. "Olar ádebıet, óner jaıynda materıal jarııalap, sheteldiń belgili JOO-larymen tanystyrady, al eń bastysy, jas tolqynnyń ózin-ózi tárbıeleýine áser etedi. Nelikten jastardy balet, teatr qyzyqtyrmaıdy, ne sebepti olar kitap oqýdyń ornyna ýaqytyn áleýmettik jelilerge arnaıdy? Osy atalǵan máseleler bizdi de tolǵandyrdy. Túrli chattar men m-agentterden olardy alyp shyǵý úshin qyzyqty ári paıdaly suhbattardy usynýdy jón kórdik. Bul suhbattardyń keıipkerleri - aýdıtorııamyzben qurdas ónerli, talantty, shyǵarmashylyqpen aınalysatyn jastar. Qazirdiń ózinde materıaldarymyzǵa jazylǵan pikirlerdi qarap otyrsaq, oqyrman qaýymnyń ózine qajetti tanymdyq aqparatty alatynyn, biz usynǵan ádebıetti oqýǵa qulshynyp, foto-sholýymyzdaǵy kitaphanalarǵa qyzyǵýshylyq tanyta bastaǵanyn ańǵarýǵa bolady. Joba 1 aı buryn iske qosylsa da, materıaldarymyz oqyrmandardyń kópshiligin shabyttandyryp, zamandastarymyzdyń ómirlik tájirıbesi men jetistikterin tanýǵa yqpal etkenin zor senimmen aıta alamyn. Osyǵan qarap, ustanǵan baǵytymyz durys dep oılaımyn", - dedi saıt redaktory.
Osy aıdan bastap "Ekpin" jýrnalısteri foto-sholýlardyń toptamasyn bastady, onyń ishinde qalalyq kitaphanalardyń erekshelikteri, Almatydaǵy JOO-lardyń jataqhanalary, kórmeler men mádenı oshaqtardy tanystyratyn fotoreportajdar bar. "Ekpin" jobasynyń jýrnalısi Aıjan Káribaeva: "Bizdiń qandaı da bir suhbat, fotoreportajymyzdyń basty maqsaty - jastarǵa jańa serpin berý, bıik murattarǵa shabyttandyrý. Olardy jaqsylyqqa baýlyp, odan da joǵary deńgeıge jeteleý", - deıdi.
Yvision.kz blog-tuǵyrnamasynyń kommertsııalyq dırektory Bekejan Kembaevtyń aıtýynsha, jańa jobany ári qaraı damytý úshin demeýshiler qajet bolyp otyr. "Tanymdyq-mádenı jobany demep otyratyn kompanııa izdestirýdemiz, sebebi bul iri brendterdiń bedelin arttyratyn tamasha múmkindik" - deıdi ol.
