Almatyda jastardyń «Jańa tolqyn 100+» atty forýmy ótti
Saltanatty sharaǵa QR Prezıdentiniń ákimshiligi QHA hatshylyǵynyń meńgerýshisi Janseıit Túımebaev, QR Prezıdenti janyndaǵy «Qoǵamdyq kelisim» RMM dırektory S.Májıtov, QHA jańǵyrý joly RJQ aımaqtyq kóshbasshylary, Qazaqstannyń túkpir-túkpirinen jastar uıymdarynyń basshylary qatysty.
Sonymen qatar, jıynda 100 jańa esim jobasynyń laýreattary qatysyp, jetistikke jetý joldarymen bólisti.
Forýmnyń maqsaty jastardy bilim alýǵa jáne bos ýaqyttaryn ótkizýdiń tıimdi, ári belsendi formalaryn izdeýge tartý men yntalandyrý, Jastar jyly aıasynda jańa ıdeıalar men joblardy qoldaý, sondaı-aq, «Qazaqstannyń 100 jańa esimi» jobasy jeńimpazdarynyń jetistikterimen tanystyrý bolyp tabylady.
Qazaqstan halqy Assambleıasy tóraǵasynyń orynbasary - QR Prezıdentiniń Ákimshiligi QHA hatshylyǵynyń meńgerýshisi Janseıit Túımebaev quttyqtaý sóz sóıledi.
«Ótken saılaýdyń mańyzy zor. Elbasy qalaǵan Qazaqstan damýynyń strategııalyq baǵyty ary qaraı jalǵasyn tabatyn bolady. Saılaý nátıjeleri halqymyzdyń joǵarǵy saıası mádenıet, azamattyq kemeldik deńgeıin tanytyp dáleldedi. Bárimiz de eldiń turaqtylyǵyna, qaýipsizdigi men órleýine senimdimiz. Bul saılaýda jastar da óz únin qosty. Búgin «Jańa tolqyn 100+» formatynda kezdesip otyrmyz. Bul forým jastarymyzdyń arasynda kommýnıkatıvtilikti jaqsartpaq. QHA janynan «Jańǵyrý joly» jastar qozǵalysy ashylǵaly beri 1 jyl ýaqyt ótti. Birinshi jyly QHA jastar uıymdarynyń bir arnaǵa shoǵyrlandyrý jumystary júrgizildi. 17 qalalyq jáne oblystyq shtab quryldy. Bul uıymda qazir 5 myńǵa jýyq jas belsindi jumys istep jatyr. Qasym-Jomart Toqaev óz sózinde jastardyń progrestiń qozǵaýshy kúshi, Qazaqstannyń damýynda sheshýshi ról atqaratynyn aıtty», - dedi Janseıit Túımebaev.
Onyń aıtýynsha, bıyl QHA birqatar jańa jobalardyń tusaýyn kespek.
«Áleýmettik hakaton», «Aýyl ákimi bolǵym keledi», «jastar sınergııasy» jastardyń barlyq potentsıalyn ashýǵa múmkindik bermek.
Jıynda Respýblıkanyń aımaqtarynan kelgen jastar baıandamalaryn jasady.
Atap aıtsaq, «Qazaqstannyń 100 jańa tulǵasy» jobasynyń jeńimpazy, QR Prezıdenti janyndaǵy Memlekettik basqarý akademııasy Aqmola oblysy boıynsha fılıalynyń dırektory Bella Gazdıeva, Soltústik Qazaqstan oblysy «Jańǵyrý joly» RJQ aımaqtyq shtabynyń tóraǵasy Roksana Orynbasarova, «Eriktiler lıgasy» qoǵamdyq qorynyń tóraıymy Aısulý Ernııazova, «JAGSYLYQJASA» jobasynyń avtory Elchın Hamedov baıandama jasap, jobalaryn tanystyrdy.
