Almatyda jastardyń munaıgaz forýmy ótip jatyr
ALMATY. 16 sáýir. QazAqparat /Erbol Azanbek/ - Búgin Almatydaǵy Q.Sátpaev atyndaǵy Qazaq ulttyq tehnıkalyq ýnıversıtetinde (QazUTÝ) TMD men Qazaqstan stýdentteriniń 8-shi munaıgaz forýmy bastaldy. Sharany QazUTÝ janyndaǵy munaıshy ınjenerler qoǵamynyń («KNTU SPE Student Chapter») stýdentter bólimi uıymdastyrǵan.
Forým aıasynda stýdenttik ǵylymı-tájirıbelik konferentsııa, «Oil Games» ıntellektýaldyq oıyny, «Munaı kompanııalarymen stýdentter arasyndaǵy áriptestik nátıjesinde kásibı mamandardy qalyptastyrý» atty «dóńgelek ústel», sondaı-aq stýdentter men munaıgaz kompanııalarynyń mamandary úshin tehnıkalyq semınar ótkizilýde.
«Shevron» kompanııasynyń ókili Janar Qoshpanovanyń aıtýynsha, bul forým iri munaıgaz kásiporyndary men stýdentter arasyndaǵy dıalog alańy bolyp tabylady. «Bizdiń kompanııa birneshe joǵary oqý oryndarymen, ásirese QazUTÝ-men tyǵyz baılanysta. Sońǵy 4 jylda biz ýnıversıtettiń 150 stýdentine tolyq jáne jartylaı stıpendııa berdik»,- dedi J. Qoshpanova.
Shara uıymdastyrýshylarynyń aıtýynsha, munaıshylardyń jastar forýmy stýdentterge jańa tehnologııalar men jańa tehnıkalyq sheshimderdi óndiriske engizýge talpynys jasaýǵa múmkindik beredi. Al oqytýshylar men munaıgaz kompanııalary úshin munaıgaz óndirisinde adam resýrstaryn damytýdyń strategııasyn qalyptastyrýǵa múmkindik beredi.
«Bundaı sharalar stýdentterge munaıgaz ınjenerleri kúndelikti jumys barysynda ushyrasatyn mańyzdy sheshimderdi úırenýge múmkindik beredi. Forým aıasynda ótetin trenıngterde, tehnıkalyq prezentatsııalarda, «Dóńgelek ústelderde» bilim almasylyp, munaıgaz salasyndaǵy jetekshi kompanııalarmen stýdentter arasynda ary qaraıǵy áriptestiktiń «bolashaǵy» anyqtalady»,- deıdi QazUTÝ-dyń Munaı jáne gaz ınstıtýtynyń 3 kýrs stýdenti, forým menedjeri Talǵat Áýbákirov.
Munaıgaz forýmyn «BG Kazakhstan», «Chevron», «Baker Hughes», «Maersk Oil Kazakhstan GmbH.», «Tengizchevroil», «Karachaganak Petroleum Operating BV» jáne kóptegen kompanııalar qoldaǵan.
