Almatyda jastardyń mamandyq tańdaýyna baǵyt-baǵdar beretin festıval ótýde
ALMATY. 15 naýryz. QazAqparat - Búgin Almatyda Oqýshylar saraıynyń ǵımaratynda Almaty qalasy Bilim basqarmasy men «EDTECH-KZ» Halyqaralyq Bilim Ortalyǵynyń uıymdastyrýymen «І Almaty halyqaralyq mamandyq tańdaý festıvali»
bastaldy. Atalmysh shara elimizde tuńǵysh ret ótkizilip otyr.
Sharanyń maqsaty - jastardyń mamandyq tańdaýyna baǵyt-baǵdar berý bolyp tabylady. Festıvalde mektep túlekterine orta bilim týraly attestattaryn almas buryn mamandyq tańdaýyna múmkindik berilmek.
Úsh kúnge sozylatyn festıvalge mektep muǵalimderi, qalanyń mektep bitirýshi jas túlekteri men olardyń ata-analary arnaıy shaqyryldy. Oqýshylar shara barysynda kásiptik dıagnostıkalaý nátıjeleri negizinde ózderi tańdap alǵan sektsııalarǵa qatysatyn bolady. Mamandyq tańdaý sektsııalary 4 baǵyttan turady. Olar: tehnıka, ekonomıka, gýmanıtarlyq jáne medıtsına salalary boıynsha mamandyqtar. Festıval barysynda oqýshylar psıhologııalyq keńester alyp, arnaıy daıyndalǵan shoý-baǵdarlamaǵa, qyzyqty baıqaýlarǵa qatysa alady. Ár qatysýshyǵa «Mamandyqqa jol» atty kitapsha syılyq retinde tabystalmaq. Festıvalge mektep oqýshylarymen qatar, Almaty qalasynyń barlyq JOO-y qatysyp jatyr. Uıymdastyrýshylar óz mamandyǵyn taba almaı júrgen barlyq jastardy sharaǵa qatysýǵa shaqyrady. Olar munda arnaıy testten ótip, qandaı mamandyq ıesine jaqyn ekendikterin anyqtaı alady.
Atalmysh shara «EDTECH-KZ» Halyqaralyq Bilim ortalyǵynyń bastamasymen qolǵa alynǵan «Kásibı baǵdar berý» jobasy aıasynda ótýde.
Almaty qalasy Bilim basqarmasy bastyǵynyń orynbasary Galına Samatokınanyń aıtýynsha, «Kásibı baǵdar berý» jobasy - álemniń eshbir elinde áli jasalmaǵan, kásiptik baǵdar berý isin dıagnostıkalaýdyń ozyq baǵdarlamasy bolyp tabylady. «Baǵdarlama Qazaqstannyń bilim berý júıesine beıimdelip, álemdik tájirıbeniń úlgilerin paıdalana otyryp ázirlendi», - dedi ol. Onyń pikirinshe, bul bastama ár jas túlektiń mamandyqty durys tańdaı bilýine yqpal etýimen qatar, mamandyǵyna saı emes jumys istep júrgen on myńdaǵan jastardyń máselesin sheshýge yqpal etpek.
«EDTECH-KZ» Halyqaralyq Bilim ortalyǵynyń Bas dırektory Ǵanı Beısenbaevtiń aıtýynsha, baǵdarlama jobasy Almaty qalasy Bilim basqarmasynyń qoldaýymen bıyldan bastap Almaty qalasynyń mektepterine engizile bastady. «Jobanyń birinshi kezeńi boıynsha qaladaǵy 180 mekteptiń, 8000-ǵa jýyq 11 synyp oqýshylary alǵash ret kásibin dıagnostıkalaý testisinen tegin ótkizildi. Nátıjesinde oqýshylar ózderiniń jeke tulǵalyq qabiletterine baılanysty, mamandyqtyń túrleri týrasynda keńester alyp, óz tańdaýyn jasady»,-dedi ol.
Onyń aıtýynsha, testtiń nátıjesimen oqýshylardyń 85 paıyzy kelisken. Tek, 15 paıyzy ǵana ózi baıaǵydan tańdap qoıǵan mamandyqta qalǵan.
