Almatyda Jastardyń halyq shyǵarmashylyǵy festıvalinde ulttardyń mádenı muralary pash etildi (foto)
«Ýnıversıtet qabyrǵasynda alǵash ret ótkizilip otyrǵan Jastardyń halyq shyǵarmashylyǵy festıvaliniń basty maqsaty - Qazaqstan Respýblıkasynda turyp jatqan ulttar men ulystardyń mádenı murasyn, halyq shyǵarmashylyǵyn, salt-dástúrleri men ádet-ǵurpyn nasıhattaı otyryp, ultaralyq kelisimniń qazaqstandyq modelin odan ári nyǵaıtýǵa barynsha úles qosý. Búgingi ótkizilip otyrǵan festıval Qazaqstan halqynyń ulttyq mádenıeti men tarıhyn, salt-dástúri men halyq shyǵarmashylyǵyn kópshilik qaýymǵa keńinen tanystyrýǵa múmkindik beredi. Sondyqtan onyń bolashaqta Qazaqstan halqynyń birligi men kelisimin pash etetin aıtýly mádenı sharaǵa aınalatyndyǵyna senimimiz zor» - dedi óziniń quttyqtaý sózinde atalmysh joǵary oqý ornynyń prorektory, professor Baýyrjan Nurahmetov.
Ýnıversıtet stýdentteri festıval barysynda orys, ýkraın, ózbek, káris, uıǵyr, armıan, grek, ázerbaıjan, túrik jáne taǵy basqa da etnostardyń ulttyq bıleri men halyq ánderin joǵary deńgeıde oryndady. Al olardyń ónerlerin Qazaqstan halqy Assambleıasynyń múshelerinen quralǵan ádilqazylar alqasy baǵalady.
«Ulttyq bı» jáne «Ulttyq án» atalymdary boıynsha bas júlde jáne I-II-III oryn alǵan fakýltetter men «Kórermender kózaıymy» júldesin jeńip alǵan fakýltet stýdentteri arnaıy dıplomdarmen jáne aqshalaı syılyqtarmen marapattaldy.
Festıvalge qatysqan qonaqtar, Qazaqstan halqy Assambleıasynyń músheleri jáne qalalyq etnomádenı birlestikterdiń ókilderi osyndaı mádenı-rýhanı sharalardyń jıi ótkizilip turýyna tilektestik bildirdi.
Sáıkesinshe, uıymdastyrýshylar endi festıvaldi aldaǵy ýaqytta respýblıka deńgeıinde ótkizýdi josparlap otyr.
