Almatyda jastardy óz densaýlyǵyna jaýapkershilikpen qaraýǵa shaqyratyn shara ótti
ALMATY. 6 maýsym. QazAqparat /Názıra Eleýhan/ - Ótken senbide Almatyda «Jastar úıi» áleýmettik mekeme túlekterin qoldaý men beıimdeý ortalyǵynda Dúnıejúzilik balalardy qorǵaý kúnine arnalǵan «Ómirge qulshynyspen belsendi ómir súr!» atty shara ótti.
Atalmysh sharanyń uıymdastyrýshylary -JQTB-men kúres jáne aldyn alý respýblıkalyq jáne qalalyq ortalyǵy, PSI korporatsııasynyń kommertsııalyq emes ortalyqazııalyq fılıaly, «Qamqor» daǵdarys ortalyǵy janyndaǵy «Youth Power» jastar ortalyǵy.
«Aktsııanyń maqsaty -jastar men jasóspirimderdi óz densaýlyǵyna jaýapkershilikpen qaraýǵa shaqyrý, qoǵam nazaryn AQTQ máselesine aýdartý, jas býyndy osy dertten tekserý men jasyryn keńes alýǵa degen múmkinshilikterin arttyrý, sonymen qatar, tekserilý túrleriniń jańa tásilderimen aqparattandyrý bolyp tabylady»,-deıdi sharanyń uıymdastyrýshylary.
Aktsııaǵa «Jastar úıi» áleýmettik mekemeleriniń 70-ten asa túlekteri men qala jastary qatysty.
Shara barysynda olarǵa osy ınfektsııa jáne onyń aldyn alý, qorǵaný boıynsha aqparattar berildi, arnaıy daıyndalǵan paraqshalar taratyldy jáne jastarǵa «jedel baılanys» telefondary tanystyryldy. Aktsııa kezinde JQTB-men kúres qalalyq ortalyǵynan arnaıy ákelingen jyljymaly tekserý zerthanasy jumys istedi. Onda qala jastary jasyryn testileýden ótýge múmkindik aldy. Bul sharalarmen qatar, qatysýshylarǵa arnaıy baıqaýlar men jarystar uıymdastyryldy. Onyń jeńimpazdaryna syılyqtar tabystaldy.
Aktsııa kontserttik baǵdarlamamen jalǵasty.
JQTB-men kúres jáne aldyn alý respýblıkalyq ortalyǵynyń málimetinshe, 1 mamyr kúni elimiz boıynsha osy dertke shaldyqqan 16 412 adam tirkelgen. Epıdemııa bastalǵaly beri 1019 adam bul indetten kóz jumǵan, onyń ishinde 6 bala bar.
