Almatyda jastardy ásker qataryna shyǵaryp salý rásimi ótkizildi
ALMATY. 3 qazan. QazAqparat /Názıra Eleýhan/ - Búgin Almatyda N. Sats atyndaǵy Memlekettik Akademııalyq balalar men jasóspirimderge arnalǵan orys teatrynda
Almaty qalasy Áýezov aýdany ákimdiginiń jáne qorǵanys isteri boıynsha aýdandyq basqarmasynyń uıymdastyrýymen alǵashqy kúzgi áskerge shaqyrylǵandardy áskerı qyzmetke shyǵaryp salý saltanatty sharasy bolyp ótti.
Áskerge shyǵaryp salýǵa jastardyń ata-analary, Uly Otan soǵysy men Qarýly Kúshter ardagerleri, Qarýly kúshter generaldary, aýǵan jaýyngerleri jáne aýdandaǵy joǵary ári arnaıy orta oqý oryndarynyń stýdentteri men oqýshylary keldi. Bolashaq Otan qorǵaýshylar úshin Qazaqstan Qarýly Kúshteriniń qyzmeti týraly beınefılm kórsetilip, QR Qorǵanys mınıstrliginiń áskerı orkestri óz ónerin kórsetti. Bunymen qatar, barsha qaýym nazaryna QR Qorǵanys mınıstrligi Ortalyq ansambliniń jáne aýdannyń talantty shyǵarmashylyq ujymdarynyń qatysýymen kontserttik baǵdarlama usynyldy.
Shara barysynda Áýezov aýdanynyń ákimi Bekqalı Torǵaev, Almaty qalasy qorǵanys ister boıynsha basqarmasynyń bastyǵy men ata-analar jyly lebizderin bildirip, jastarǵa sát-sapar tiledi.
Bul shara jastardy patrıottyq turǵyda tárbıeleý maqsatynda jyl saıyn kúzde, ári kóktemde ótkiziledi. Qarýly Kúshterde qyzmet etý ár azamattyń qurmetti boryshy jáne mindeti bolyp tabylady.
