Almatyda jastar teatry salynady

ALMATY. QazAqparat- Almatyda 2023 jyly jastar teatrynyń qurylysy bastalady. Bul týraly qala ákimi Erbolat Dosaev Almaty qalasy máslıhatynyń kezekten tys HHHІ sessııasynda aıtty, dep habarlaıdy QazAqparat tilshisi.

«Qazaqstannyń halyq ártisi Asanáli Áshimovtyń usynysy boıynsha kelesi jyly megapolıste jastar teatry salynady. Smetalyq-jobalaý qujattamasy men orny daıyn bolǵan soń qurylysyn bastaımyz», - dedi qala ákimi.

Aıtýynsha, Almatyny mádenı astana retindegi mártebesin nyǵaıtý basty mindetterdiń biri. «Ol úshin Almatynyń 2025 jylǵa deıingi damý baǵdarlamasy sheńberinde kelesi jyly qoldanystaǵy mádenıet obektilerin jańǵyrtýǵa jáne jańa mádenıet obektilerin salýǵa, ári mádenı-buqaralyq is-sharalardy ótkizýge nazar aýdaramyz. Máselen, 2023 jyly mádenıet obektileriniń ınfraqurylymyna erekshe nazar aýdarylatyn bolady, búginde olardyń 70 protsenti tozǵan»,- deıdi Erbolat Dosaev.

Halyqaralyq standarttarǵa sáıkes qala turǵyndary men týrısterdi tartý ortalyǵyna aınaldyrý maqsatynda Almaty haıýanattar baǵyn kezeń-kezeńmen rekonstrýktsııalaýdy bastaý josparlanýda.

Buǵan qosa, 2 mlrd teńgege «Alataý» dástúrli óner teatryna kúrdeli jóndeý jumystaryn júrgizemiz. Qýyrshaq teatryn, qalalyq arhıvti jańǵyrtý jáne kitaphanalardy tsıfrlandyrý bastalady. «Sonymen qatar, bıyl Qazaq memlekettik tsırkiniń ǵımaratyn jańǵyrtýǵa, qazaq zaǵıptar qoǵamy men qazaq sańyraýlar qoǵamy úshin mádenıet úıiniń jańa ǵımaratyn salýǵa jobalaý-smetalyq qujattama daıyndadyq. Bul maqsatqa qosymsha qarajat bólinedi»,- dedi qala basshysy.