Almatyda jastar shyǵarmashylyǵy festıvaliniń gala-kontserti ótti
ALMATY. 3 qarasha. QazAqparat /Erbol Turymbetov/ - Búgin Almatydaǵy Ó. Joldasbekov atyndaǵy Stýdentter saraıynda «Jas juldyz» atty Almaty qalalyq jastar shyǵarmashylyǵy festıvaliniń gala-kontserti bolyp ótti.
Ony Almaty qalasy jastar saıasatyn damytý basqarmasynyń qoldaýymen Almaty qalasy jastar saıasatyn damytý memlekettik qory jáne «Jastar shyǵarmashylyq bastamalaryn qoldaý ortalyǵy» qoǵamdyq qory birlese uıymdastyrdy.
«Budan buryn irikteý kezeńi Q. Sátbaev atyndaǵy QazUTÝ-da ótken edi. Odan 20 úmitker iriktelip, búgingi saıysqa qatysyp otyr. Bul baıqaýda biz ánniń barlyq túrin qamtýǵa tyrystyq, ıaǵnı, munda estrada, zamanaýı ánder, dástúrli ánder de aıtylady. Jarys jeńimpazdary respýblıkalyq jarystarǵa qatysatyn bolady», - dedi Almaty qalasy jastar saıasaty basqarmasynyń bastyǵy Baqtııar Máken.
Baıqaýǵa ánshi, Memlekettik syılyqtyń laýreaty Nurǵalı Núsipjanov tóraǵalyq etti. Saıysta 5 atalym boıynsha jeńimpazdar anyqtaldy. Qorytyndysynda estradadan QazUTÝ stýdenti Rasýl Jarmaǵambetov, dástúrli ánnen Qurmanǵazy atyndaǵy ulttyq konservatorııa stýdenti Esbol Shymbaev, halyq bıinen QyzPÝ-niń «Tomırıs» bı toby, zamanaýı bıden Súleımen Demırel atyndaǵy Qazaq-túrik ýnıversıtetiniń «MM Dans» bı toby jáne kúıshiler saıysynan Abaı atyndaǵy Qazaq ulttyq pedagogıkalyq ýnıversıtettiń stýdenti Áıgerim Burshaqbaeva top jardy.
Uıymdastyrýshylar bul saıystyń dástúrli túrde jalǵasa beretindigin málim etti.
