Almatyda «Jastar Prezıdentpen birge jarqyn keleshekke!» atty forým ótti

Bul týraly atalmysh joǵary oqý ornynyń baspasóz qyzmeti habarlady.

Elbasy N.Nazarbaev óziniń «Jas Otan» jastar qanatynyń II sezinde sóılegen sózinde elimizdiń ındýstrııalyq-ınnovatsııalyq damýy jáne Otanymyzdyń qaýipsizdigi men turaqtylyǵyn nyǵaıtý isine jastardy tartýdyń mańyzy men qajettiligi týraly atap aıtqany belgili.

Jastardyń azamattyq, otansúıgishtik áleýetin arttyrý men olardyń tyń bastamalaryna qoldaý kórsetý maqsatynda ál-Farabı atyndaǵy Qazaq ulttyq ýnıversıteti Almaty qalasy ákimdiginiń qoldaýymen forým ótkizip otyr.

Ashylý rásimindegi sózinde QazUÝ rektory Ǵalym Mutanov: «Búgingi forým táýelsizdigimizdiń tuǵyryn kóteredi. Bul tek ulttyq mereke emes, táýelsizdigimizdiń sımvoly. «Túzý basshy uzaq joldy qysqartady» dep Ahmet Baıtursynov aıtqandaı, Elbasy 20 jylda kóp eńbek etýde. El erteńi jastar jarqyn bolashaqqa batyl qadamdar jasaıdy dep senemin, erteńgi Qazaqstan sizderge baılanysty. Elbasymen birge - jańa bıikterge», - dedi.

«Bul forým Elbasynyń syndarly saıasatyn nasıhattaý, jastar arasynda talqylaý, Memleket basshysyna degen senimimizdi bildirý. QazUÝ-diń Stýdentter saraıynda Almaty qalasy jastarynyń basyn qosyp otyrmyz. Óz oıym, el erteńin qalyptastyrý úshin, biz bilimdi de bilikti maman atanyp, maqtan tutarlyq tulǵa bolýymyz kerek», - degen pikirin bildirdi halyqaralyq qatynastar fakýltetiniń 1 kýrs stýdenti Nursultan Orynbekov:

Alqaly jıynǵa respýblıkalyq jastar uıymdarynyń kóshbasshylary, halyqaralyq jáne respýblıkalyq baıqaýlar men jarystardyń jeńimpazdary, prezıdenttik jáne ataýly shákirtaqy ıegerleri, túrli salalarda tabystarǵa jetken talantty jastardyń ókilderi qatysyp, óz oılaryn ortaǵa saldy. Forýmǵa qatysýshylar atynan Qazaqstan jastaryna arnalǵan úndeý joldandy.  

Forým aıasynda QazUÝ tehnoparki túrli salalardaǵy stýdenttik bıznes jobalardy damytý men júzege asyrý úshin qurylǵan ınnovatsııalyq ınfraqurylymdyq alań - ýnıversıtettik stýdenttik bıznes-ınkýbatordyń tusaýkeserin ótkizdi.