Almatyda jastar kóshbasshylarynyń keńesi ótti
Jastar jyly qarsańynda qolǵa alynǵan «JasStar moments» dep atalatyn sharaǵa jýrnalıstıka, sport, bıznes jáne taǵy da basqa salalarda tabysqa jetken tulǵalar belgili taqyryp aıasynda sóz sóılep, óz tájirıbelerimen bólisti.
- Jobanyń maqsaty - Almatydaǵy jastar kóshbasshylarymen birlese otyryp Jastar jylynda atqarylar jumystardy júıeleý, naqty jospar daıyndaý. Jurtshylyqqa tanymal, belgili bir salada jetistikke jetken tulǵalarmen kezdesý ótkizip, óskeleń urpaqtyń patrıottyq sezimderin arttyrýǵa yqpal etý. Sondaı-aq qala jastary arasynda ózara tyǵyz baılanys ornatýdy da kózdep otyrmyz, - deıdi uıymdastyrýshylar.
Bul shara barysynda «Stýdent - sport» taqyrybynda Sıdneı Olımpıadasynyń chempıony, Qazaqstanǵa eńbegi sińgen sport sheberi Ermahan Ybraıymov pen Paralımpıada oıyndarynyń jeńimpazy, «100 jańa esim» jobasynyń jeńimpazy Serik Esmatov, «Stýdent - áleýmet» taqyrybynda «Jastar úni» qoǵamdyq birlestiginiń tóraǵasy Dáýren Babamuratov, «Stýdent - mádenıet» taqyrybynda telejúrgizýshi Gúlnaz Aýdanbaeva, «Stýdent - bıznes» taqyrybynda jas kásipker Áset Jumaqulov jáne «Stýdent - bilim» taqyrybynda «Bolashaq» qaýymdastyǵynyń Almaty qalasyndaǵy fılıalynyń tóraıymy Qymbat Ábdikerimova men Ashat Ábjanov sóz sóıledi.
Taǵylymy mol, motıvatsııasy zor jıynǵa sonymen qatar, Almaty qalasyndaǵy 21 joǵary oqý ornynan 70 delegat, «Qazaqstan stýdentter alıansy» jáne «Jarasym» jastar uıymynyń músheleri qatysty.
Delegattar Qyzdar ýnıversıtetiniń bastamasymen uıymdastyrylyp otyrǵan basqosýlar jastardyń tanym deńgeıi men oı-órisin arttyrýǵa tıgizetin septigi zor ekendigin aıtady. Olar aldaǵy ýaqytta ýnıversıtettiń belsendi stýdentteriniń bastamasymen uıymdastyrylǵan osyndaı formattaǵy jıyndardy óz oqý ornynda da ótkizýge nıet bildirdi.
Forým aıasynda Qyzdar ýnıversıtetiniń jastar uıymdarynyń tóraıymdary jáne belsendileri ant qabyldady.
Avtor: Elaman Turysbekov
