Almatyda «Jastar kásipkerlik ortalyǵy» ashyldy
ALMATY. Qazannyń 28-i. QazAqparat /Ádilet Musahaev/ - Búgin Halyqaralyq bıznes ýnıversıtetinde «Jastar kásipkerlik ortalyǵy» ashyldy,
dep habarlaıdy QazAqparat.
Qoǵamdyq «Jastar kásipkerlik ortalyǵy» birlestigi kommertsııalyq jáne saıası ujymǵa jatpaıtyn, táýelsiz stýdentter men jas mamandardyń óz qareketterin júzege asyrý ujymy bolyp tabylady.
«Stýdentterdiń basqarýshylyǵymen ashylǵan bul ortalyqtyń maqsaty - jastar arasynda kásipkerlikti damytyp, olardyń bıznes saýattylyǵyn ulǵaıtyp, jas mamandardyń kásibı deńgeıin nyǵaıtý. Búgin sonyń resmı ashylýy bolyp otyr, osy shara barysynda aıta keter taǵy bir jáıt, bıyl jeke kásipker oqýshylar arasynda «TIFE 2010» baıqaýyn ótkizbekshimiz. Ol boıynsha oqýshylar trenıngke qatysyp, keıin ózderiniń bıznes josparlaryn jasaıdy. Sol josparlardy aqpannyń 28-i kúni ótetin «TIFE 2010» baıqaýynda kórsetedi, odan ótkender Ortalyq Azııa «TIFE 2010» baıqaýyna joldama alady. Qyrǵyzstan, Bashqurtstan jáne Ázirbaıjan elderiniń jastary qatysatyn bul sharany Almaty qalasynda ótkizbekpiz», deıdi «TIFE 2010» jobasynyń úılestirýshisi, atalmysh oqý ornynyń stýdenti Gúljan Aıtileý.
