Almatyda jastar arasyndaǵy 40 qylmystyń 38-in ózge óńirden kelgender jasaǵan
Almatyda jasóspirimder arasynda jasalǵan 40 qylmys tirkelse, onyń 38-in basqa qalalardan kelgen jasóspirimder jasaǵan. Bul týraly Almaty qalalyq Polıtsııa departamentiniń Jergilikti polıtsııa qyzmeti basqarmasynyń bastyǵy Manap Sattarov málim etti.
«Taldaý kórsetkendeı, 40 qylmystyń 38-in basqa qalalardan kelgen jasóspirimder jasaǵan. Atap aıtqanda, Almaty oblysy – 22, Jambyl oblysy – 9, Qostanaı oblysy – 3, Shyǵys Qazaqstan oblysy – 1, Túrkistan oblysy – 2, Nur-Sultan qalasynyń turǵyndary – 1. Kámeletke tolmaǵandar jasaǵan qylmystardyń eń kóp bóligi – múliktik quqyq buzýshylyqtar. Bul – urlyq, tonaý jáne bóten kólikterdi aıdap áketý», – dedi ol.
Sondaı-aq, Almatyda kámeletke tolmaǵandar arasynda quqyq buzýshylyqty aldyn alý boıynsha 12 jedel-profılaktıkalyq shara ótkizildi.
«Qabyldanǵan is-sharalardyń nátıjesinde ishki ister organdaryna túrli quqyq buzýshylyq jasaǵany úshin 9 596 adam jetkizildi. Onyń ishinde 9 348-i ákimshilik quqyq buzýshylyq úshin. 470 jasóspirim, sondaı-aq 429 turmysy nashar otbasy anyqtalyp, esepke alyndy. Qıyn ómirlik jaǵdaıdaǵy balalardy qoldaý ortalyǵyna 463 bala ornalastyryldy. Kámeletke tolmaǵandardyń túngi ýaqytta zańdy ókilderinsiz oıyn-saýyq mekemelerinde jáne turǵyn úılerden tys jerde júrgeni úshin 5 005 ata-ana ákimshilik jaýapkershilikke tartyldy», – dep atap ótti Manap Sattarov.
