Almatyda jasóspirimdi jezókshelikpen aınalysýǵa májbúrlegen áıel ustaldy
NUR-SULTAN. QazAqparat – Іshki ister mınıstrligi el aýmaǵynda «Stop-trafık» jedel aldyn alý sharasyn ótkizdi, dep habarlaıdy QazAqparat tilshisi.
«Bul sharanyń maqsaty – adam saýdasyna, jeńgetaılyqqa, adamdy májbúrli eńbekke tartýǵa qatysty qylmystardyń betin ashý. Aktsııa barysynda adam saýdasynyń túrleri, májbúrli eńbek pen seksýaldy quldyqqa qarsy kúres sharalaryna qatysty aqparattandyrý jumysyna basa mán berildi. Úsh kúnniń ishinde bul baǵytta 65 qylmys tirkeldi. Atap aıtqanda adam saýdasyna qatysty 6, májbúrli eńbekke tartýǵa qatysty 1 qylmys anyqtaldy», - dedi baspasóz máslıhatynda ІІM baspasóz qyzmetiniń qyzmetkeri Kámil Ǵalıev.
Sonymen qatar aktsııa barysynda polıtsııa qyzmetkerleri jezókshelerdiń 48 prıtonyn anyqtaǵan. Jezókshelikke tartýdyń 10 jaǵdaıy (olardyń bireýi kámeletke tolmaǵan) tirkelgen.
Polıtsııa ókili naqty mysaldy keltirdi.
«Almatyda eki boıjetkendi aldap, qorqytyp jezókshelikke tartty degen kúdikpen 26 jastaǵy áıel ustaldy. Onyń Qyzylorda oblysynyń týmasy ekeni belgili bolyp otyr. Zardap shekkenderdiń biri kámeletke de tolmaǵan. Polıtsııa bul faktini áleýmettik jelilerdi taldap otyrǵan kezde anyqtady. Álgi boıjetken ıntımdi qyzmet kórsetetini týraly habarlama berip otyryp ustalǵan», - deıdi ol.
Kúdikti QR Qylmystyq kodeksiniń 134-baby (kámeletke tolmaǵan adamdy jezókshelikpen aınalysýǵa tartý) jáne 308-baby (jezókshelikpen aınalysýǵa tartý) boıynsha jaýapqa tartylǵan. Zardap shekkenderge kómek kórsetilýde.
