Almatyda jasóspirimdi soqqyǵa jyqqan er adam ustaldy

ALMATY. QazAqparat – «Shymbulaq» taý kýrortynda ornalasqan qonaq úıdiń birinde jasóspirimdi uryp-soqqan. Bul týraly zardap shegýshiniń ápkesi áleýmettik jelide jazdy. Kúdikti ustaldy, dep habarlaıdy QazAqparat tilshisi.

Almaty turǵyny Instagram-daǵy paraqshasynda on tórt jasar inisin er adam uryp tastaǵany týraly jazdy.

«Balanyń aıtýynsha, ol dámhanaǵa shaı alýǵa barǵan. Ortada kóńil kóterip, bılep júrgen eresek er adamdar ony qolynan tartyp bıleýge shaqyrǵan. Alaıda, inim bıleýden bas tartqan. Nátıjıesinde ony soqqyǵa jyqty», - dep jazdy jeli qoldanýshy.

Almaty qalalyq Polıtsııa departamentiniń baspasóz qyzmeti patrýldik polıtsııa men jedel-tergeý toby oqıǵa ornyna barǵanyn habarlady.

Jasóspirimdi urdy degen kúdikpen 1983 jyly týǵan A.J.Mádıev esimdi azamat ustalyp, QR QK 293-baby (Buzaqylyq) boıynsha qylmystyq jaýapkershilikke tartyldy.

«Jasóspirimge alǵan jaraqattarynyń aýyrlyǵyn anyqtaý maqsatynda sot-medıtsınalyq saraptama taǵaıyndaldy. Sonymen birge saýnada demalǵan adamdarǵa karantın normalaryn buzý faktisi boıynsha QR Ákimshilik quqyq buzýshylyq týraly 425-babyna sáıkes ákimshilik materıal resimdelip, SES-ke jiberildi», - deıdi Medeý aýdandyq polıtsııa basqarmasynyń bastyǵy Dáýren Ótebaev.