Almatyda jasóspirimder arasyndaǵy qylmys 22,4%- ǵa tómendedi
Qanat Taımerdenovtyń aıtýynsha, qabyldanǵan sharalardyń nátıjesinde búginde jasóspirimder arasyndaǵy qylmystyń 22,4% tómendeýi baıqalady. Sondaı-aq kámeletke tolmaǵandarǵa qarsy jasalǵan qylmystar sany 5,6%-ǵa azaıdy.
«Kámeletke tolmaǵandar arasyndaǵy quqyq buzýshylyqtyń aldyn alý jumystary erekshe baqylaýda. Jyl basynan beri 417 jasóspirim men 375 jaǵdaıy nashar otbasy anyqtalyp, ishki ister organdaryna esepke alyndy. 12 qıyn jasóspirim devıantty minez-qulyqty balalarǵa arnalǵan arnaıy bilim berý uıymyna jiberildi. Sonymen qatar 407 kámeletke tolmaǵandar qıyn ómirlik jaǵdaıdaǵy balalardy qoldaý ortalyǵyna ornalastyryldy. Kámeletke tolmaǵandar arasynda quqyq buzýshylyqtyń aldyn alý maqsatynda jyl basynan beri jalpyqalalyq 14 jedel aldyn alý sharasy uıymdastyryldy», – dedi Qanat Taımerdenov.
Sonymen qatar, ol mektepterdi jáne irgeles aýmaqtardy qamtý boıynsha aldyn alý jumysty jaqsartý maqsatynda osy jyldyń maýsym aıynda uıymdyq kadrlyq ózgerister bolǵanyn atap ótti.
«Bilim mekemelerine bekitilgen «mektep ınspektorlary» kámeletke tolmaǵandardyń isteri jónindegi aımaqtyq ınspektorlar qyzmetine aýystyryldy. Endi ınspektorlar tek mektepke ǵana emes, ózine senip tapsyrylǵan ákimshilik aımaqqa da qyzmet kórsetedi», – dedi Almaty qalasy Polıtsııa departamentiniń basshysy.
