Almatyda jasóspirimder arasynda JQTB týraly málimetterdi keńinen taratýǵa arnalǵan joba aıaqtaldy
ALMATY. Naýryzdyń 12-si. QazAqparat /Názıra Eleýhan/ - Almatyda Eýropalyq Odaqtyń Qaraǵandy, Almaty jáne Temirtaý qalalaryndaǵy túzeý jáne basqa da memlekettik áleýmettik mekemelerdegi jasóspirimder arasynda JQTB týraly málimetterdi keńinen taratýǵa arnalǵan "Ómirdiń qundylyǵy" atty joba aıaqtaldy.
Bul týraly búgin Almatyda "Halyqaralyq áleýmettik jobalar qaýymdastyǵy" qoǵamdyq birlestiginiń ókilderi málim etti, dep habarlaıdy QazAqparat.
2008 jyly bastalǵan eki jyldyq joba Eýropalyq Odaqtyń qarjylandyrýymen iske asty. Oǵan 98 myń eýro bólingen bolatyn. Sharanyń maqsaty - balalar úıiniń, ınternattardyń jáne túzeý mekemelerindegi tárbıelenýshilerge JQTB-nyń juqpalylyǵy týraly tolyqqandy málimet berip, bul derttiń sanyn azaıtý bolyp tabylady.
«Jobanyń ereksheligi, muǵalimder men tárbıeshiler jańasha oqý modýlimen, qaýipti derttiń aldyn alýda erekshe tásildi qoldana otyryp, jasóspirimderge ómirdiń qundylyǵyn túsindiredi», deıdi Halyqaralyq áleýmettik jobalar qaýymdastyǵy" qoǵamdyq birlestiginiń dırektory Sılvııa Galbıatı.
«Baǵdarlama aıasynda 137 tárbıeshiler men muǵalimder oqyp shyqty. Olardyń qatarynda «AVSI» ıtalıandyq qorynyń jáne «Fundatia Dezvoltarea Popoarelor» rýmynııalyq uıymnyń halyqaralyq ókilderi bar», dedi jobanyń úılestirýshisi Janar Ospanova. Onyń aıtýynsha, naqty taqyryptar boıynsha semınarlar men pikirtalas toptaryna 278 jasóspirim qatysqan.
