Almatyda «Jas Juldyz - 2011» atty jastardyń shyǵarmashylyq festıvali ótip jatyr
ALMATY. 5 qarasha. QazAqparat /Názıra Eleýhan/ - Almatyda el táýelsizdiginiń 20 jyldyǵyna arnalǵan «Jas Juldyz - 2011» atty jastardyń shyǵarmashylyq festıvali bastaldy.
Almaty qalasynyń jastar saıasatyn damytý memlekettik qorynyń uıymdastyrýymen ótip jatqan baıqaýǵa qalalyq, respýblıkalyq jáne halyqaralyq baıqaýlardyń jeńimpazdary, JOO men orta bilim beretin oqý oryndarynyń stýdentteri, sonymen qatar, qaladaǵy jastar klýbtarynyń ókilderi qatysýda.
Qazirgi ýaqytta Q.Sátbaev atyndaǵy Qazaq ulttyq tehnıkalyq ýnıversıtetinde baıqaýdyń irikteý syndary ótýde.
Uıymdastyrýshylardyń aıtýynsha, ótinishter 30 qyrkúıekten - 30 qazanǵa deıin qabyldanǵan.
Festıval barysynda túrli án, bı baıqaýlary, kúıshiler saıysy, patrıottyq ánder men avtorlyq ánder baıqaýy ótetin bolady.
Sharanyń maqsaty - talantty jastardyń shyǵarmashylyǵyna jaǵdaı jasaý, talantty da, daryndy jastardy anyqtaý, oqý oryndary arasynda baılanys ornatý, jastardy qalanyń qoǵamdyq ómirine belsene aralasýyna tartý bolyp tabylady.
Baıqaý jeńimpazdary dıplomdarmen, festıval kýbogymen jáne baǵaly syılyqtarmen marapattalady.
