Almatyda jas jetkinshekterdiń reprodýktıvti densaýlyqtaryna qatysty másele talqylandy
Almatynyń 14-ten 18 jasqa deıingi jas jetkinshek-qyzdary reprodýktıvti quqyq týraly ne biledi? Olar qandaı máselelerge kezigedi? Búgin Almatyda osy máselelerge arnalǵan "dóńgelek ústel" otyrysy bolyp ótti.
Jıynǵa jastar ortalyqtarynyń, densaýlyq saqtaý salasynda jumys isteıtin ÚEU ókilderi men dárigerler qatysty.
Dóńgelek ústelge qatysýshylardyń pikirinshe, elimizde jynystyq taqyryptarǵa suraqtar ashyq túrde aıtylmaıtyn jaǵdaıda. "Jasóspirimder kóp jaǵdaıda mundaı suraqtar týyndaǵanda qaıda bararyn, ne isterin, kimnen keńes alaryn, tipti, kimmen sóıleserin de bilmeıdi. Bul keleńsiz jaǵdaılarǵa, tipti aıaǵynyń aýyrlaýyna, túsik tastatýǵa, tastandy balalar sanynyń ulǵaıýyna ákep soǵýda", - deıdi olar.
"Ár adam erte me, kesh pe, otbasyn qurýdy, al, áıel adam deni saý sábıdi dúnıege ákelýdi oılaıdy. Sondyqtan, ár jetkinshek reprodýktıvti densaýlyǵyn oılaýy qajet, jynystyq tárbıe jaıynda aqparattanýy kerek",-deıdi "Zabota" daǵdarys ortalyǵynyń erikti jattyqtyrýshy Ilıa Zolın.
Onyń aıtýynsha, jasóspirimderdiń kópshiligi arnaıy kómek alý baılanys telefondaryn, keńes alý oryndaryn, kontratseptik ádister túrleri jaıynda bilmeıdi. "Elimizde 16 jastaǵy qyz balalar kásibı mamannyń kómegin ala almaıdy, ıaǵnı ata-anasymen birge barmasa qabyldaýynda bola almaıdy. Aqparattanbaǵandyq, bilmegendik ár túrli jaǵdaılarǵa ákelip soǵýda. Júkti bolyp qalǵan qyzdar, ata-anasynyń bilmeýi úshin jeke menshik emhanalarǵa júginýi de sondyqtan. Al, ol jerge barǵan qyzdardyń odan keıin sábıli bolatynyna eshkim kepil bermeıdi. Biz sol sebepti, jetkinshek qyzdar 14 jastan ata-anasynsyz gınekologqa qaralýy kerek dep sanaımyz. Búginde bul tájirıbege Reseı, Moldova elderi kóshken", - dedi ol.
Dóńgelek ústelge qatysýshylardyń pikirinshe, bul máselelerdiń sheshimi ártúrli memlekettik jáne qoǵamdyq mekemelerdiń, uıymdar men mamandar qyzmetiniń úılesimdi jumys isteýiniń jáne jastar baǵdarlamalaryn tolyqqandy qarjylandyrýdyń arqasynda ǵana múmkin bolmaq.
