Almatyda «Jas Ulan» áskerı-sporttyq oıyndary ótýde
ALMATY. QazAqparat - Almatyda orta bilim berý mekemeleriniń oqýshylary arasynda qalalyq «Jas ulan» áskerı-sporttyq oıyndary ótti, dep habarlaıdy QazAqparat tilshisi.
«Jas ulan» áskerı-sporttyq oıyndary jas urpaqtyń sana-sezimin jetildirý, saıası turaqtylyqty dáripteý arqyly jastardyń boıynda qazaqstandyq patrıotızmdi tárbıeleý maqsatynda ótti.
Uıymdastyrylyp otyrǵan is-sharaǵa Almaty qalasy aýdandarynyń «Jas ulan» áskerı-sporttyq oıyndarynyń aýdandyq jeńimpazdary qatysady.
«Jas ulan» áskerı oıyndary sharasy ekinshi jyl ótkizilýde. Ár jyly aýdandarda mekteparalyq irikteý júrgiziledi. Eń jaqsy nátıjege jetken komanda qalalyq oıyndarǵa ótedi. Osy saıysta jeńiske jetken komanda Almaty qalasynyń atynan respýblıkalyq baıqaýǵa attanady. Respýblıkalyq baıqaýda birinshi oryn alsaq, bizdiń jasap jatqan eńbegimizdiń zaıa ketpegeni dep túsinemiz. Saıysqa kelip otyrǵan balalar kóptegen áskerı klýbtarǵa qatysady. Ol jaqta áskerı mamandar balalardy avtomatpen, basqa da qurylǵylarmen qoldanýdy, eptilik pen batyldyqqa úıretedi», - dedi Almaty «№1 Oqýshylar úıi» dırektory Dáýirhan Qojahmetov.
Jastar eki kún ishinde tarıhı zertteý jobasyn qorǵap, saptardyń kórinisi, atys daıarlyǵy, áskerı kross, týrnıkke tartylý, deneni jerden kóterip túsirý (otjımanıe), júzý (estafeta) boıynsha baq synaıdy.
«Bul eki kún ǵana bolsa da, onyń ar jaǵynda úlken eńbek bar. Máselen, irikteý kezin biz qysta júrgizemiz, oǵan eki aıdaı ýaqyt ketedi. Buryn baıqaýymyzdyń aty «Alaý», «Aıbyn» dep atalsa, qazir «Jas Ulan» dep ataldy. Aty ózgergenmen, saıys - dástúrli túrde ótetin áskerı oıyn. Áskerı qyzmet memlekettik qyzmettiń ishindegi eń erekshesi. Sondyqtan, osyndaı úlken masshtabtaǵy oıyndar júrgizý arqyly elimizdiń azamattaryna motıvatsııa syılaımyz», - dedi Bilim basqarmasynyń alǵashqy áskerı daıyndyq jónindegi qalalyq ádistemelik komıtetiniń ádiskeri, maıor Qadyrbek Ibraımov.
Top jarǵan úzdikter erteń belgili bolady.
