Almatyda Jas tilshilerdiń ІІ forýmy ótti
dep habarlaıdy QazAqparat.
«Ýnıversıtet respýblıkalyq «Ulan» jáne «Drýjnye rebıata» balalar gazetterimen birlesip, oqýshylar shyǵarmashylyǵyna baıqaý jarııalaǵan bolatyn. Olardyń shyǵarmalary osy basylymdarda jaryq kórdi. Mine endi osy baıqaýdyń jeńimpazdary forýmǵa qatysýda. Baıqaý Uly Otan soǵysy jeńisiniń 65 jyldyǵyna arnaldy. Onyń maqsaty - Ál-Farabı atyndaǵy QazUÝ-dyń jýrnalıstıka fakýltetine túsýdi armandaıtyn, óz bolashaǵyn jýrnalıstıka, radıo, televızııa, pıar, baspa isine arnaǵysy keletin daryndy da talapty jasóspirimderdi izdestirý, tanytý, sondaı-aq jýrnalıstik ortaǵa tartý bolyp tabylady», deıdi jýrnalıstıka fakýltetiniń dekany professor Ǵalııa Ybraeva.
«Ulan» gazetiniń bas redaktory Eseı Jeńisulynyń aıtýynsha, baıqaýǵa 100-den asa oqýshy qatysqan. «Biz osy baıqaýdan 15 balany iriktep aldyq dep oılaımyn. Ótken jyly da 15 balany iriktep alǵan edik. Onyń 5-eýi qazir osy QazUÝ-diń jýrnalıstıka, ekeýi fılologııa fakýltetinde oqıdy. Búgingi forýmnan bolashaq jýrnalıster úlken estelikpen qaıtady degen senimdemin», dedi Eseı Jeńisuly. Ol sonymen qatar bıylǵy jeńimpazdardyń arasynda Aqsý aýdany, Qyzyl aǵash aýylynyń oqýshysy da bar ekendigin atap ótti.
Forýmda barlyq jeńimpazdar dıplomdarmen marapattalatyn bolady.
